„Þetta lítur ekki vel út… En ég hef ekki áhyggjur. Ég þekki fólkið hérna og stjórnmálin betur en margir halda. Ég held að þetta verði ekki vandamál. Ég er handviss um að við munum halda hvalveiðum áfram á næsta ári,“ sagði Kristján Loftsson, forstjóri Hvals hf., í samtali við breska miðilinn Guardian.
Núgildandi veiðileyfi Hvals hf. rennur út um áramótin en þrátt fyrir það virðist Kristján ekki áhyggjufullur um framhaldið. Hann segist viss um að hann fái að halda veiðunum áfram, nóg sé af hvali. Þá nefnir hann hugmyndir um hvernig sé hægt að nota hvalkjötið og telur ólíklegt að veiðarnar verði bannaðar. Hvalveiðarnar í ár vöktu hörð viðbrögð og mótmælti fjöldi fólks við höfnina. Ekki liggur fyrir hvort veiðileyfið verði endurnýjað að svo stöddu.