„Heldurðu ekki að þeir sendi ekki bara varðskip á mig? Ég trúi ekki að Landhelgisgæsla Íslands hafi látið hafa sig út í þessa helvítis vitleysu,“ segir Magnús Kr. Guðmundsson skipstjóri á strandveiðibátnum Valþjófi.
Þetta er kolruglað
„Veistu hvað þessi sýning á einhverju sem átti að vera fíkniefnahandtaka kostaði þjóðina? Sem átti að vera einhver voðalega merkileg frétt í blöðin? Og hvað gera þeir ofan á það? Þeir hringja þeir í fólkið mitt til að spyrja hvort ég sé með skotvopn í bátnum. Þetta er kolruglað”.
Í gær birti Mannlíf frétt um að varðskip hefði verið kallað til vegna mögulegs lögbrots Magnúsar. Hann var að koma úr róðri og var að landa í Flateyjarhöfn þegar að lögregla birtist á bryggjunni og hugðist handtaka hann. Magnúsi var ofboðið, hélt aftur í bátinn og réri út og í fréttinni segir að eftir eltingarleik hafi varðskipsmenn komist um borð og handtekið hann.
Magnús segist það alls ekki rétt, þeir hafi aldrei komið um borð í bátinn. „Þegar ég kom aftur í fjörðinn hótuðu þeir að ef ég færi ekki í land myndu þeir kalla á Sérsveitina. Ég vil bara hafa frið og ró svo ég sigldi sjálfur til hafnar, afhenti bróður mínum bátinn og settist sjálfviljugur og pollrólegur upp í lögreglubíl“.
Neita að ljúga að heilbrigðiskerfinu
Magnús hefur verið greindur með ADHD á hæsta stigi en fær ekki lyfin sín lengur. „Ég neitaði að ljúga að heilbrigðiskerfinu að ég hefði ekki reykt gras. Ég vil koma heiðarlega fram. En þá fæ ég lyfin mín ekki uppáskrifuð og ég fúnkera ekki án lyfjanna svo ég kaupi þau svart og það er ekkert leyndarmál. Auðvitað má aldrei sigla dópaður en ég þekki vel lyfin mín. Ég er reyndur skipstjóri til fjölda ára. Var ég einhverjum hætta á trillunni minni? Aldeilis ekki. Ég hef ekki gert neinum neitt nema sigla sjóinn í friði. Hver er forgangsröðunin hjá lögreglunni. Að elta Magga? Ég forðast átök en á auðvitað mína fortíð, bernskubrek, sem ég held að þeir séu enn að elta mig út af“.
Magnús segir það algjört rugl að stórfé að skattpeningum almennings sé eytt svo að lögreglan á Ísafirði geti tékkað á lyfseðlunum hans. „Þetta er fáránlegt og hreinlega mannvonska að menn geti ekki séð í gegnum fingur sér með lyf sem ég nauðsynlega þarf á að halda. Það ætti að reka þennan lögregluvarstjóra á nóinu”.
Milljóna rugl á kostnað skattgreiðenda
Magnús segist hafa orðið reiður þegar átti að taka bátinn með valdi og látið til sín heyra í talstöðinni og hafi fjöldi fólks heyrt samskiptin. „Þeir vita mæta vel að ég er að taka þetta lyf án lyfseðils og að ég myndi falla á þessu lyfjaprófi en þeim fannst greinilega svo nauðsynlegt að láta mig missa skipstjórnarprófið. Þeir hafa látið svona við aðra stráka, flotta skipstjórnarmenn sem hafa verið handteknir, niðurlægðir og misst réttindin.
Ég var bara einn um borð í trillunni minni, bláedrú, en búin að taka lyfin sem ég tek alla daga. Auðvitað er ég ekki með lyfseðil en fyrr má nú vera, að kalla út Landhelgisgæsluna út vegna þess? Hvað ætli þetta rugl hafi kostað skattgreiðendur margar milljónir?“
Magnús ætlar ekki að gefa sig. „Ég ætla út á mánudaginn. Þeir geta þá bara komið og stoppað mig. Verði þeim að því“.