Smit kom upp í Hörðuvallaskóla í Kópavogi í gærkvöld. Starfsmaður í frístund greindist jákvæður fyrir Covid. Póstur var sendur á foreldra nemenda. Skólastjóri tilgreinir að þetta sé fyrsta smitið sem upp kemur innan skólans í þessari bylgju faraldsins. Alls eru 900 nemendur í skólanum sem er stærsti grunnskóli landsins.
Í tölvupósti skólastjóra er farið yfir þessi mál.
„Nú er komið upp fyrsta smit í þessari bylgju innan skólans. Starfsmaður í frístund greindist í gærkvöldi. Búið er að sótthreinsa öll svæði sem þurfti að þrífa vegna þessa og rekja hvaða starfsmenn og börn gætu hafa verið útsett fyrir smiti. Allir starfsmenn í frístund og börn sem voru í frístund á þriðjudag og miðvikudag í þessari viku fara í úrvinnslusóttkví. Póstur var sendur á foreldra þessara barna í dag.“
Undnafarna daga hafa um 100 manns greinst jákvæðir á dag á landinu öllu, langflestir í Reykjavík og nágrenni. Vonir standa til þess að bylgjan hafi náð hámarki sínu og að yfirvöldum hafi teksist að koma böndum á veiruna. Fjölmargar takmarkanir eru í gildi á höfuðborgarsvæðinu til að halda niðri smiti og er fólki af landsbyggðinnni ráðlagt að leggja ekki leið sína til Reykjavíkur þar sem veiran gengur ljósum logum. Sömuleiðis er lagt að höfuðborgarbúum að halda sig heima þessa viku og þá næstu.