Föstudagur 17. maí, 2024
5.8 C
Reykjavik
Senda ábendingu
VefTv
Hlaðvörp

Fer með börn á slóðir fossa og eldfjalla

Dalla Ólafsdóttir er nýr umsjónarmaður Ferðafélags barnanna.

Dagskrá Ferðafélags barnanna, FB, fyrir árið 2018 er komin út og þar er að finna 25 ferðir fyrir börn og foreldra þeirra, bæði vinsælar ferðir frá fyrri árum og nýjungar í bland.

Af nýjungum má nefna Fjallagarpaverkefni fjölskyldunnar sem Dalla Ólafsdóttir, annar tveggja nýrra umsjónarmanna FB, segir að standi öllum börnum til boða. „Gengið verður á sex skemmtileg fjöll, Esjuna, Úlfarsfell, Helgafell í Hafnarfirði, Mosfell, Móskarðshnúka og Þorbjörn,“ lýsir hún og getur þess að fjallahetjurnar John Snorri Sigurjónsson og Vilborg Arna Gissurardóttir sláist með í för á nokkur þeirra.

Þá býður Ferðafélag barnanna í fyrsta sinn upp á eldfjalla- og fossagöngu yfir Fimmvörðuháls. „Á leiðinni upp er gengið upp tröppur með fram Skógafossi og svo fram hjá fjölda fossa þar til gist verður í Baldvinsskála á Fimmvörðuhálsi,“ segir Dalla. „Næsta dag verða ein yngstu eldfjöll landsins, Magna og Móða, skoðuð, farið yfir Heljarkamb og gengið í Þórsmörk þar sem við tekur kvöldvaka í Skagfjörðsskála í Langadal.“

„Ég hlakka mikið til. Börn eru svo opin og móttækileg þannig að það verður gaman að kynna fyrir þeim íslenska náttúru og öll ævintýrin sem hún býður upp á.“

Af öðrum ferðum má nefna sveppatínslu, kræklingaferð í Hvalfjörð og pödduskoðun í Elliðaárdal en þær ferðir eru samstarfsverkefni Ferðafélags barnanna og Háskóla Íslands. „Þetta eru allt ferðir sem eru farnar á forsendum krakka, á þeirra hraða og út frá þeirra getu,“ útskýrir hún. „Þannig að krakkar, fimm til sex ára, geta allir með góðri hvatningu tekið þátt og jafnvel yngri duglegir krakkar.“

Sjálf segist hún vera spennt að takast á við þetta nýja verkefni. „Ég hlakka mikið til. Börn eru svo opin og móttækileg þannig að það verður gaman að kynna fyrir þeim íslenska náttúru og öll ævintýrin sem hún býður upp á.“

Ferðafélag barnanna er hugsað til að hvetja börn og foreldra til útiveru og samveru í náttúru landsins og starfar innan Ferðafélags Íslands. Allar nánari upplýsingar um félagið og ferðir þess má nálgast á heimasíðu FÍ, á www.fi.is.

Myndi: Hjónin Dalla Ólafsdóttir og Matthías Sigurðarson eru nýir umsjónarmenn Ferðafélags barnanna. Hér eru þau með börnum sínum í Þórsmörk.

Texti / Roald Eyvindsson
Mynd / Dalla Ólafsdóttir

Gunnar Björn gerir glæpamynd fyrir börn

|
|

Leikstjórinn Gunnar B. Guðmundsson áformar að færa skáldsögu Þórarins Leifssonar „Maðurinn sem hataði börn“ yfir á hvíta tjaldið. Hann reiknar með að myndin verði sitt dekksta verk til þessa.

Bók Þórarins hlaut glimmrandi góða dóma þegar hún kom út 2014 og var meðal annars tilnefnd til Íslensku bókmenntaverðlaunanna í flokki barnabóka.

„Þetta er á algjöru frumstigi, þannig að ég vil nú ekki segja of mikið. Bara að sem stendur er ég að plana fyrsta uppkast og sú vinna gengur vel,“ segir leikstjórinn Gunnar B. Guðmundsson sem er um þessar mundir að þróa handrit upp úr skáldsögunni „Maðurinn sem hataði börn“ eftir Þórarinn Leifsson rithöfund.

Bók Þórarins hlaut glimmrandi góða dóma þegar hún kom út 2014 og var meðal annars tilnefnd til Íslensku bókmenntaverðlaunanna í flokki barnabóka. Hún fjallar um Sylvek, ungan innflytjanda í Reykjavík, sem ákveður upp á sitt einsdæmi að rannsaka hvarf systur sinnar vegna sinnuleysis lögreglu og kynnist á vegferð sinni alls kyns áhugaverðum persónum. Þar á meðal dularfullum leigjanda, reffilegri blaðakonu, ógurlegum steratröllum og síðast en ekki síst sturluðum raðmorðingja.

Þeir sem lesið hafa söguna vita að hún er ansi blóðug á köflum. Gunnar viðurkennir fúslega að verkið sé í dekkri kantinum. Sérstaklega í ljósi þess að það er skrifað með unga lesendur í huga. „Ég er einmitt að vinna í því að tóna ofbeldið svolítið niður í handritinu,“ segir hann. „Því þótt þetta sé auðvitað fyrst og fremst glæpasaga fyrir krakka þá er samt óþarfi að sýna allt.“

„Ég er einmitt að vinna í því að tóna ofbeldið svolítið niður í handritinu,“ segir hann. „Því þótt þetta sé auðvitað fyrst og fremst glæpasaga fyrir krakka þá er samt óþarfi að sýna allt.“

Af því þú nefnir það, hafa glæpamyndir verið gerðar fyrir krakka á Íslandi áður? „Myndir með glæpaívafi, já, en þetta yrði kannski fyrsta hreinrækaða glæpamyndin. Að því sögðu má þó ekki gleyma að saga Þórarins er fantasía líka og full af svörtum húmor og ég ætla að halda í þá þætti.“

Auk þess að skrifa handritið segist Gunnar stefna að því að leikstýra myndinni sjálfur. „Maðurinn sem hataði börn“ yrði því fyrsta kvikmynd hans í fullri lengd síðan „Gauragangur“ var frumsýnd árið 2010. Sú mynd byggir einmitt líka á bók, samnefndri skáldsögu Ólafs Hauks Símonarsonar og segir Gunnar að vinnan við gerð hennar komi nú að góðum notum í handritavinnunni.

„Þess utan hef ég verið í bandi við frábæra ráðgjafa hjá handritaverkefninu Cinekid og svo heyrt lítillega í Þórarni, sem er mjög þægilegur og rólegur yfir þessu öllu saman,“ segir hann. „Þannig að þetta er búið að vera skemmtileg vinna, sem ég vona bara að muni skila sér inn í myndina.“

Hvenær hefjast tökur? „Auðvitað er erfitt að segja til um það á þessu stigi málsins, í miðjum skrifum. En ef allt gengur að óskum erum við sennilega að tala um 2020. Það er rökrétt.“

Texti / Roald Eyvindsson
Mynd / Róbert Karl Ingimundarson

Íslenskur brimbrettamaður í stórri þáttaseríu

Heiðar Logi Elíasson, fyrsti atvinnumaðurinn á brimbretti á Íslandi, og samstarfsmaður hans, Erlendur Þór Magnússon ljósmyndari, taka þátt í gerð seríu framleiddri af risaveldinu Red Bull.

„Það er að koma hingað erlent tökulið og það ætlar að fylgja okkur Ella eftir á för okkar um landið, þar sem við leitum uppi háar og kraftmiklar öldur á afviknum stöðum til að takast á við þær. Þetta verður svona „skyggnst á bak við tjöldin“ dæmi, viðtöl í bland við senur þar sem hreinlega allt getur gerst,“ segir brimbrettakappinn Heiðar Logi Elíasson kátur í bragði.

Hann og vinur hans og samstarfsfélagi til nokkurra ára, Erlendur Þór Magnússon ljósmyndari, hafa gert samning um að koma fram í annarri seríu af þáttunum Chasing the Shot sem beinir sjónum að ljósmyndurum sem leggja allt kapp á að ná hinni fullkomnu mynd af jaðaríþróttafólki – oft við erfiðar aðstæður. Fyrri serían var meðal annars tekin upp á Hawaii og Nýja-Sjálandi og hlaut góðar viðtökur en það er risaveldið Red Bull sem framleiðir þættina.

„Þetta er náttúrlega mjög flott verkefni. Ég meina, þetta er það sem okkur Ella hefur lengi dreymt um. Að gera okkar eigið „stöff“.“

Spurður um hvernig það hafi komið til að þeir félagar hafi verið fengnir til að koma fram í þáttunum segir Heiðar Logi hugmyndina hafa sprottið upp í samræðum sem hann átti við aðila innan Red Bull í fyrra. Hún hafi smám saman undið upp á sig og sé nú að verða að veruleika. „Þetta er náttúrlega mjög flott verkefni,“ segir hann, auðheyrilega spenntur. „Ég meina, þetta er það sem okkur Ella hefur lengi dreymt um. Að gera okkar eigið „stöff“.“

Í þeim stóru verkefnum sem þeir félagar hafi hingað til komið að hafi þeir meira verið hluti af teymi, eins og í nýlegri heimildamynd á Netflix sem kallast Under an Arctic Sky og fjallar bæði um þá og annað brimbrettafólk sem er að eltast við hina fullkomnu öldu. Í Chasing the Shot verði fókusinn hins vegar alfarið á þá. Auk þess hafi þeir miklu frjálsari hendur með efnistök. „Þannig að við ætlum að nota tækifærið og sýna allt sem við erum að bralla saman. Hluti sem við höfum aldrei sýnt á „vídeó“ áður. Fólk á eftir að fá alveg nýja sýn inn í það sem við erum að gera.“

Að sögn Heiðars er tökuliðið væntanlegt til landsins í febrúar og er áætlað að þættirnir verði aðgengilegir í sumar. Ekki sé búið að negla niður tökustaði að svo stöddu. Þeir ráðist af veðráttunni. „Við förum bara þangað sem stormarnir og háu öldurnar verða hverju sinni,“ segir hann hress.

Mynd: Heiðar Logi Elíasson hefur getið sér gott orð sem brimbrettamaður en hægt er að fylgjast með ævintýrum hans á bæði Snapchat og Instagram undir notendanafninu heidarlogi.

Texti / Roald Eyvindsson
Mynd / Aldís Pálsdóttir

Úr Elly í Rocky Horror

Björn Stefánsson leikur Riff Raff í Rocky Horror.

Leikarinn og trommuleikarinn Björn Stefánsson, einnig þekktur sem Bjössi í Mínus, hefur nú bæst í leikararhóp söngleiksins Rocky Horror sem verður frumsýndur í Borgarleikhúsinu í mars. Björn mun bregða sér í hlutverk ískalda einkaþjónsins Riff Raffs, sem upphaflega var leikinn af Richard O´Brien, höfundi verksins, í bíómynd byggðri á verkinu. Til stóð að leikarinn Atli Rafn Sigurðarson færi með hlutverk persónunnar en eins og kunnugt er var honum sagt upp störfum í leikhúsinu í desember í fyrra.

Björn, sem vakið hefur athygli fyrir leik sinn í Elly og í kvikmyndinni Rökkur, var því fenginn til að leysa Atla Rafn af hólmi og hefur hann undanfarnar vikur verið að æfa af krafti með leikhópi Rocky Horror, sem skartar stórstjörnum á borð við Pál Óskar og Val Frey Einarsson. Miklar vonir eru bundar við uppsetningu leikhússins á verkinu enda er Rocky Horror einn vinsælasti söngleikur allra tíma.

Texti / Roald Eyvindsson
Mynd / Skot úr myndinni Rökkur þar sem Björn fór með annað aðalhlutverkið.

Metaðsókn í Sundhöll Reykjavíkur

Sundhöll Reykjavíkur aldrei vinsæll en nú.

Óhætt er að segja að Sundhöllin í Reykjavík hafi aldrei verið jafnvinsæl og nú. Hvorki meira né minna en tæplega 36 þúsund manns lögðu leið sína í laugina í desember í fyrra eftir að hún var opnuð á nýjan leik 3. desember eftir miklar breytingar. En til samanburðar má geta að tæplega níu þúsund gestir sóttu Sundhöllina í desember árið á undan.

„Þetta er algjör sprengja miðað við fyrri ár,“ segir Brá Guðmundsdóttir, þjónustu- og mannauðsráðgjafi hjá Laugardagslaug og Sundhöll Reykjavíkur. „Við erum að tala um metaðsókn.“

Brá segir að breytingar á Sundhöllinni, sem fela meðal annars í sér byggingu viðbyggingar og útisvæðis, hafi augljóslega hitt í mark. Enda séu flestir á einu máli um að þær séu vel heppnaðar. Þá sýni ferðamenn lauginni aukinn áhuga, sem eigi þátt í þessari miklu aðsókn. Með sama áframhaldi megi reikna með metaðsókn í Sundhöllina á árinu. „Ég býst við því og að gamla sólbaðsaðstaðan og nýja útivistarsvæðið komi þá sterkt inn í veðursældinni í sumar,“ segir hún glaðlega.

Að sögn Brár hófust framkvæmdir við nýju útilaugina á vormánuðum 2015 og var Sundhöllin lokuð vegna framkvæmda frá júní 2017 fram til desember sama ár. VA arkitektar eiga heiðurinn af viðbótunum en Guðjón Samúelsson, þáverandi húsameistari, hannaði gömlu höllina.

Texti / Roald Eyvindsson
Mynd / Íþrótta- og tómstundasvið Reykjavíkur

Lykillinn að góðum rakstri

Rakstur er mikilvægur þáttur í húðumhirðu karla. Hér eru nokkur góð ráð.

Mjúkt skegg tryggir betri rakstur
Lykillinn að góðum rakstri er að tryggja það að skeggið sé vel blautt áður en hafist er handa. Þurrt skegg er nefnilega mun harðara sem gerir það að verkum að raksturinn er erfiðari og rakvélarblöðin slitna fyrr. Best er að skella sér í heita sturtu og raka sig svo eftir hana, en ef ekki gefst tími til að fara í sturtu er gott að setja vel heitan og rakan þvottapoka á andlitið í um það bil tvær mínútur fyrir raksturinn. Þetta mýkir skeggið, ásamt því að örva og opna húðina, þannig að raksturinn verður léttari og útkoman betri.

Sápa og bursti
Notið raksápu sem inniheldur mikið af rakagefandi og smyrjandi efnum, til dæmis glyseríni og silíkoni, eða góðan anditshreinsi sem freyðir vel. Gæðaraksápur mynda þykka og mjúka froðu án aðstoðar freyðiefna á borð við súlföt sem geta þurrkað húðina. Ef tími gefst er gott að leyfa raksápunni að vera um stund á húðinni áður en raksturinn hefst svo skeggið verði eins mjúkt og mögulegt er. Þótt sumar raksápur megi hæglega bera á með fingrunum jafnast ekkert á við að nota góðan rakbursta, eins og alvörurakarar nota, því hann ýfir skegghárin þannig að raksturinn verður enn fínni en annars.

Vertu með, ekki á móti
Við raksturinn er mikilvægt að nota góða rakvél, hvort sem um ræðir rafmagnsrakvél eða sköfu. Sköfu á alltaf að renna létt yfir hörundið, ekki þrýsta fast að, og strekkja vel á húðinni á meðan. Mikilvægt er að hreinsa rakvélarblaðið oft og vel meðan á rakstrinum stendur, svo að ekki safnist hár á milli blaðanna. Ef sápan þornar þarf aðeins að nota meira vatn og vinna froðuna aftur upp með burstanum, ekki nota meiri sápu. Það á alltaf að raka í sömu stefnu og skeggið vex, aldrei á móti. Að raka á móti skeggvextinum getur valdið sviða og inngrónum hárum í andliti ásamt því að auka líkurnar á því að maður skeri sig við raksturinn. Til að tryggja góðan rakstur getur verið gott að setja aftur á sig raksápu og raka aðra umferð en þá þvert á skeggvöxtinn, en varast samt ofrakstur.

Eftir rakstur og sótthreinsun
Meðferð eftir raksturinn er ekki síður mikilvæg og undirbúningurinn. Strax að loknum rakstri er gott að skvetta dálitlu köldu vatni á andlitið til loka húðinni aftur. Margir klikka oft á því, bera strax á sig rakspíra og uppskera mikinn sviða. En það er ekki fyrr en að húðinni hefur verið lokað á þennan hátt sem á að bera á sig rakspíra, helst einhvern sem inniheldur lítið sem ekkert alkóhól, eða rakakrem (after shave balm) til sótthreinsunar og mýkingar.

Viðhald á tækjum og tólum
Eftir hverja notkun þarf að hreinsa bæði burstann og rakvélina. Hristið vatn úr burstanum, ekki vinda hann, og geymið hann hangandi svo hárin vísi niður, en það kemur í veg fyrir að raki safnist fyrir og valdi hárlosi. Bitlaust eða skítugt blað er ein meginástæðan fyrir óþægilegum rakstri og skurðum. Rakvélarbrýni, eins og Razorpit, geta þá komið að góðum notum og gera manni kleift að spara í kaupum á rakvélarblöðum. Það eykur notkun hvers rakvélarblaðs frá tíu rökstrum upp í allt að hundrað rakstra að hreinsa það og brýna svo að það verði hárbeitt á ný.

Texti / Hildur Friðriksdóttir

Lítil kríli með viðkvæma húð

Góð ráð fyrir húðumhirðu barna.

Það er fátt yndislegra en silkimjúk og ilmandi húð ungbarna. Hún er samt miklu þynnri og viðkvæmari en húð okkar fullorðna fólksins. Þess vegna þarfnast hún góðrar umhirðu og verndar fyrsta árið. Hér eru nokkur góð ráð fyrir húðumhirðu barna.

Bleyjubossar
Þrífa þarf bossann á bleyjubörnum reglulega því það eru efni í þvagi sem geta brennt viðkvæma rassa, rétt eins og kúkur. Sumir kjósa að nota þartilgerða blautklúta en það er nóg að nota bara rakan þvottapoka eða svampklút. Ef bleyjuútbrot fara að láta á sér kræla er mikilvægt að þrífa svæðið við hver bleyjuskipti, þerra það vel og bera síðan Zink-krem á rauða rassa til að koma í veg fyrir frekari útbrot. Einnig er gott að viðra bossann eins oft og mögulegt er.

Þvottur, þvottur og meiri þvottur
Það er ekki síður nauðsynlegt að hugsa út í hvernig við þvoum föt barna. Fötin liggja á viðkvæmri húð barnsins allan daginn og því er mikilvægt velja þvottaefni sem eru mild og örugg. Margir mæla með að sleppa mýkingarefnum alveg því þau innihalda oft mikið magn ilmefna sem eru ofnæmisvaldandi.

Margir foreldrar hafa áhyggjur af því að þeir þurfi að þvo barnafötin sér. Vissulega er þess þörf ef þú notar sterkari þvottaefni og mýkingarefni á annan þvott heimilisins. Hví ekki nota tækifærið og byrja að nota mildari, sem og umhverfisvænni, þvottaefni fyrir allan þvott? Afraksturinn gæti komið þér á óvart.

Lítil, skrítin skán
Algengt er að það myndist skán í hársverði ungbarna sem er gulbrúnt fitukennt hrúður. Þessi skán er algengust ofan á hvirfli en getur einnig verið á öðrum afmörkuðum blettum eða um allan hársvörðinn. Skánin er hættulaust ástand sem varir yfirleitt ekki lengi. Þetta veldur barninu ekki óþægindum og verður minna áberandi eftir því sem meira hár vex á höfði barnsins.

Alls ekki reyna að kroppa skánina í burtu án þess að mýkja hana upp áður, þá gæti farið að blæða úr hársverðinum og myndast sýking. Best er að bera góða jurtaolíu, svo sem möndlu-, jarðhnetu- eða ólífuolíu, í hársvörðinn áður en barnið fer að sofa. Þá mýkist skánin yfir nótt og morguninn eftir er notuð fíngerð greiða eða bursti til að bursta skánina varlega, ekki fara of nærri hársverðinum þannig að höfuðleðrið ertist. Að lokum þarf að þvo höfuðið og þá skolast hrúðrið að mestu leyti burtu. Þetta gæti þó þurft að endurtaka nokkrum sinnum.

Vanda valið á kremum
Það er mjög mikilvægt að velja vandlega það sem borið er á húð ungra barna. Það er staðreynd að mörg efni geta valdið ofnæmi eða aukið hættu á húðvandamálum síðar á ævinni. Yfirleitt þarf ekki að bera neitt sérstaklega á húð barns en stundum fá börn exem eða mikinn þurrk, sérstaklega yfir vetrartímann. Þá er mikilvægt að nota krem sem hafa verið ofnæmisprófuð í þaula og innihalda hvorki ilmefni né önnur skaðleg efni. Fyrirtæki eins og Eucerin, Neutral og Weleda framleiða mjög góðar vörur sem eru sérstaklega ætlaðar fyrir ungbörn. Einnig geta börn fengið svokallaðar hormónabólur á andlitið vegna hormóna í móðurmjólkinni. Þessar bólur eru fullkomlega eðlilegar og hverfa af sjálfu sér á nokkrum vikum svo best er að láta þær alveg í friði. Þær ná oft hámarki um sex vikna aldur en fara svo að hverfa.

Texti / Hildur Friðriksdóttir

Sex einfaldar leiðir til að bæta líðan þína

|
|

Heilbrigður lífsstíll byggist á góðum venjum sem verða að rútínu.

Það er þó hægara sagt en gert. Hér eru sex einfaldar leiðir til að bæta líðan þína og gera líf þitt árangursríkra og betra.

Farðu snemma á fætur og af stað.

1. Farðu snemma á fætur og af stað
Á morgnana erum við orkumest og athygli okkar er skörpust svo sá tími er tilvalinn til að taka á þeim hlutum sem okkur finnst erfiðastir eða krefjast meiri viljastyrks – eins og til dæmis að fara í ræktina. Ef þú átt erfitt með að stunda reglulega líkamsrækt þá gæti það verið vegna þess hvaða tíma dags þú ert að fara. Eftir langan vinnudag eru flestir þreyttir og svangir svo það síðasta sem þá langar að gera er að skella sér út að skokka. Þess vegna er svo gott að fara á morgnana fyrir vinnu því þá er það bara búið og margir segjast finna aukna orku það sem eftir er dagsins eftir að hafa byrjað hann á hreyfingu.

2. Beislaðu sjálfstýringuna
Góðir ávanar hafa þann kost að með tímanum verða þeir sjálfkrafa hluti af rútínu þinni sem þýðir að þú notar minni hugarorku í að framkvæma þá. Þannig nær einmitt íþróttafólk að halda sér í góðu formi og þjálfun en þetta á ekkert síður við okkur meðaljóna. Það tekur um það bil tuttugu og einn dag að venja sig á eitthvað nýtt, en getur auðvitað tekið lengri tíma þannig að það verði okkur eðlislægt. Það þýðir að ef þú átt erfitt með að fá þér ekki sætindi seinnipartinn þá muntu smám saman hætta að hugsa um það og eftir þrjár vikur verður þú jafnvel alveg laus við löngunina.

3. Skoðaðu góðu ávana þína
Ein besta leiðin til að losa sig við slæma vana er að bæta góðum ávana við þá sem þú þegar hefur. Til dæmis ef þú ert vön að fá þér kaffibolla á morgnana getur þú tekið upp á því að fá þér grænt te eða heitt vatn með sítrónu. Þá skiptir þú út slæmum vana fyrir góðan. Þar sem þú færð enn þá heitan drykk á morgnana er breytingin auðveldari en að hætta bara að drekka kaffið. Síðan getur þú haldið áfram og vanið þig á tíu mínútur af hugleiðslu með drykknum. Smám saman verður til keðja af góðum venjum sem er í raun það sem heilbrigður lífsstíll gengur út á.

4. Skrifaðu hlutina niður
Það sem við skrifum niður er oft betur greipt í minni okkar en það sem við hugsum eða heyrum. Við erum öll af vilja gerð að standa okkur en með því að skrifa áætlanir okkar niður verðum við ósjálfrátt ábyrgari gagnvart þeim og líklegri til að standa við þær. Þó að tæknin sé til margs góðs þá hefur það ekki sömu áhrif að skrifa hlutina niður í snjallsíma eða tölvu. Sestu heldur niður og skrifaðu slæma ávana niður á blað ásamt því hvernig þú ætlar að losa þig við þá. Hengdu listann svo upp þar sem þú sérð hann reglulega.

5. Taktu á afsökununum
Það að vera stöðugt að afsaka slæma ávana getur staðið í vegi fyrir því að þú takir upp góða vana í staðinn. Ef við styðjumst aftur við dæmið um kaffibollann, þegar þú vaknar þreytt á morgnana eftir erfiða vinnuviku þá er auðvelt að réttlæta fyrir sjálfri sér að þú eigir kaffibollann skilið og að þú munir halda áfram í bindindinu á morgun. Vandinn er að sá morgundagur kemur aldrei og fyrr en varir ertu byrjuð að drekka kaffi á hverjum morgni aftur. Í stað þess að fara aftur í sama farið getur þú ákveðið að fá þér svart te í þetta skiptið, þannig færðu verðlaun. Sama gildir um líkamsræktina, ef þú getur ekki farið klukkan hálf sjö í spinning farðu þá á fætur klukkan hálf átta og farðu út að skokka í hálftíma. Þá heldur þú þér við efnið.

6. Sjáðu það fyrir þér
Það er auðvelt að gleyma nýjum venjum og ástæðan fyrir því að það er erfitt að losna við slæma vana er að við erum búin að gera þá aftur og aftur í langan tíma. Til þess að auðvelda sér hlutina er hægt að búa til sjónrænar áminningar. Ef þú vilt venja þig á að nota tannþráð á morgnana settu þá minnismiða á baðherbergisspegilinn. Ef þú vilt fara í ræktina á morgnana hafðu þá líkamsræktarfötin tilbúin við hlið rúmsins, eða sofðu í þeim – það virkar. Þessar litlu áminningar munu minna þig á vanann þar til þú þarft ekki lengur á þeim að halda og vaninn er orðinn hluti af rútínunni.

Texti / Hildur Friðriksdóttir

 

Svona innréttarðu litla stofu

Góð ráð fyrir þá sem eru með litlar stofur.

Þegar þú innréttar litla stofu reyndu að komast af með sem fæsta hluti. Þannig kemur þú í veg fyrir að hún verði óreiðukennd. Gott er að horfa reglulega yfir hana með gagnrýnum augum og fjarlægja það sem þér finnst ofaukið.

Gott er að láta lofta sem mest um húsgögnin. Ekki klessa til dæmis borði fast upp við hliðina á sófanum, eins og gert er á þessari mynd. Hafðu heldur smábil á milli þegar þú kemur því við.

Of mikil litadýrð getur verið yfirþyrmandi í lítilli stofu. Mörg mynstur eru heldur ekki æskileg. Hvít málning á veggjum er góð byrjun.

Til eru sniðug húsgögn með tvöfalt notagildi; fínir sófar sem eru líka svefnsófar, stólar/kollar með geymslurými, sófaborð með hillum á hliðunum, lítil borð sem gætu einnig þjónað sem sæti og svo framvegis. Þegar plássið er lítið þarf stundum að fórna einhverju til að lofti betur um það sem eftir er.

Stærri húsgögn ættu að standa aftast í stofunni frá dyrunum séð – en ekki staðsett við innganginn. Þá gæti þér fundist sem húsgögnin þrengi að þér. Settu þau þyngstu fjærst dyrunum og komdu hinum fyrir í góðu jafnvægi við þau.

Ef sami litur er á t.d. veggnum og sófanum mun sófinn verða minna áberandi og ekki grípa athyglina jafnauðveldlega og ef hann væri í öðrum lit. Það getur verið mjög flott að láta húsgögnin falla inn í vegginn á þennan hátt, svona á meðan maður ofgerir ekki. Þú getur líka notað málningu til að „fela“ bitana í loftinu, ofnana og annað sem þér finnst gefa stofunni draslaralegan blæ.

Haltu yfirborðinu hreinu og lausu við ónauðsynlegt dót. Með því að takmarka það sem þú geymir ofan á hillum, skápum, borðum og í gluggakistum loftar svo miklu betur um stofuna. Þú þarft alls ekki að fjarlægja allt, fækkaðu bara þessum hlutum. Allt verður svo miklu snyrtilegra. Þeir sem ætla að selja íbúðina sína ættu að hafa þetta í huga – áhrifin þegar inn í stofuna (íbúðina) er komið eru svo miklu betri á væntanlega kaupendur en þegar allt er ofhlaðið, hún virkar einnig stærri.

Veldu listaverk í meðalstærð á veggina í stað risastórra verka. Stórar myndir geta verið afar flottar en yfirþyrmandi í litlu rými. Mörg verk saman á vegg geta verið óreiðukennd ef þau eru of stór eða mjög misstór. Einhver regla verður að vera, að láta efri línur eða neðri mætast. Ef hengt er upp af algjöru handahófi njóta myndirnar sín ekki sem skyldi.

Falleg gluggatjöld geta skapað ljúfa og mjúka stemningu í stofunni en í litlu rými og nálægt húsgögnunum gleypa þau alveg stofuna. Gólfmottur skipta líka máli, of margar litlar mottur geta látið stofuna virka draslaralega. Rýmið sýnist allt svo miklu opnara ef hófsemi er gætt. Þú getur líka sleppt því að nota gluggatjöld. Rimla- eða rúllugluggatjöld geta verið fín lausn í litlum stofum.

Gott er að gera sem mest úr dagsbirtunni. Blóm og vasar í gluggakistum geta verið falleg en skyggja á birtuna.

Speglar eru magnaðir í þeim tilgangi að láta herbergi virðast stærra. Spegill á réttum stað gerir ótrúlega mikið fyrir lítil rými og getur gjörbreytt stofunni þinni.

Fleiri lampar og góð lýsing út í hvert horn er einnig af hinu góða.

Texti / Guðríður Haraldsdóttir

Siggi skyr opnar dyrnar: Úr tilraunastarfsemi í stórveldi

Sigurður Kjartan Hilmarsson, eða Siggi skyr eins og hann er yfirleitt kallaður, hóf tilraunir með skyrgerð í eldhúsinu hjá sér í New York eftir gamalli uppskrift sem móðir hans sendi honum fyrir rúmum áratug.

Núna fæst skyrið í um 25 þúsund verslunum í Bandaríkjunum og fyrirhugaður er mikill vöxtur á næstu misserum. „Það verður engin breyting á okkar starfsemi. Við munum halda áfram að starfa héðan frá New York og sama góða starfsfólkið verður mér við hlið,“ segir Siggi  og hrósar starfsfólkinu

Þetta er einhver ótrúlegasta frumkvöðlasaga Íslendings í seinni tíð og hvernig varan varð til á löngum tíma með dugnaði, klókindum og hugviti

Franski mjólkurvörurisinn Lactalis keypti fyrirtækið hans Sigga á dögunum. Kaupverðið hefur ekki verið gefið upp og er trúnaður milli kaupanda og seljenda, en það hleypur á tugum milljarða. „Fyrirtækið hefur átt hug minn allan frá fyrsta degi,“ segir Siggi.

Siggi skyr verður í ítarlegu viðtali við Magnús Halldórsson blaðamann í Mannlífi.  Blaðið kemur út á morgun föstudaginn 26. janúar og er dreift ókeypis inn á heimili á höfuðborgarsvæðinu.  Mannlíf er gefið út í samstarfi við Kjarnann.

Burstaþvottur tryggir fallegri förðun

Regluleg þrif á förðunarburstum er ávísun á betri förðun.

Mikilvægt er að þrífa förðunarburstana sína, jafnvel þótt maður sé bara að nota þá sjálfur, því það tryggir fallegri förðun en er jafnframt mjög mikilvægur þáttur í húðumhirðunni.

Það er mjög mikilvægt að þrífa förðunarburstana sína, jafnvel þótt maður sé bara að nota þá sjálfur, því það tryggir fallegri förðun en er jafnframt mjög mikilvægur þáttur í húðumhirðunni. Þegar við málum okkur þá geta bakteríur og önnur óhreinindi safnast fyrir í burstunum, sem geta valdið stíflum og bólum í húðinni seinna meir.

Hægt er að fá hreinsivökva fyrir bursta frá ýmsum snyrtivörumerkjum og það er mjög fljótlega leið til þess að þrífa og sótthreinsa bursta. Smávegis af hreinsivökvanum er þá sett í skál, burstanum dýft ofan í og svo nuddað á eldhúspappír eða hreina tusku. Megininnihaldsefni vökvans er alkóhól sem getur þurrkað burstana. Þess vegna er nauðsynlegt að djúphreinsa þá líka reglulega með sápu og vatni.

Góð regla er að þvo burstana á tveggja vikna fresti með mildri sápu eða barnasjampói, einnig getur verið gott að nota uppþvottalög á þá bursta sem eru notaðir í fljótandi farða því uppþvottalögur leysir betur upp fituna í farðanum.

Best er að þrífa burstana við vaskinn með smávegis af sápu eða sjampói í lítilli skál.  Hverjum bursta er þá dýft í sápuna, nuddað aðeins inn í lófann til að láta sápuna freyða og svo er burstinn að lokum skolaður með volgu vatni. Að lokum er gott að setja smáhárnæringu í þá bursta sem eru úr náttúrulegum hárum, leyfa henni að bíða aðeins og skola hana svo úr, þá haldast burstarnir mjúkir og fallegir.

Þegar bursti eru skolaður er mikilvægt að snúa honum niður undir bununni til að passa að ekkert vatn komist í skaftið. Þá getur límfestingin leyst upp, burstinn byrjað að „fara úr hárum“ og að lokum dottið í sundur. Af sömu ástæðu er best að láta burstana liggja flata á handklæði meðan þeir þorna, ekki hafa þá upprétta, og enn betra er að leyfa þeim að hanga aðeins út fyrir borðbrún svo loft nái að leika um þá.

Texti / Hildur Friðriksdóttir

Ekkert lát á endurgerðum

Ekkert lát virðist ætla að verða á endurgerðum Hollywood-kvikmyndum á næstunni. Hér er listi yfir nokkrar sígildar.

Ocean’s Eleven, Twelve, Thirteen og nú Ocean’s Eight!
Í hinni upprunalegu Ocean’s 11 mynd mátti sjá hina óviðjafnanlegu Rat Pack, Frank Sinatra, Dean Martin og Sammy Davis Jr. í aðalhlutverkum og myndin fékk á sínum tíma góðar viðtökur. Sagan segir frá Danny Ocean sem vill fremja stærsta rán sögunnar og til þess safnar hann saman ellefu manna úrvalsliði. Þegar ráðist var í endurgerð myndarinnar árið 2001 var öllum ljóst að leikaravalið þurfti að sambærilegt og það tókst svo sannarlega með George Clooney, Brad Pitt og Matt Damon. Þó að sígilda útgáfan sé alls ekki léleg þá verður að viðurkennast að sú nýrri hefur mun meira skemmtanagildi, er bæði fyndnari og meira spennandi, og verður því yfirleitt ofan á í samanburðinum. Nú er von á fjórðu myndinni og þar verða skærustu kvenstjörnur Hollywood í aðalhlutverkum, meðal annars Cate Blanchett, Sandra Bullock og Anne Hathaway.

3:10 to Yuma
Þó svo að sumir ríghaldi með klassísku útgáfunni af 3:10 to Yuma sem kom út árið 1957 eru flestir á sama máli um að endurgerð James Mangold frá árinu 2007 sé mun betri. Það er einkum vegna þess að tækninni hefur fleygt töluvert fram á þessum fimmtíu árum og því er hasarinn í myndinni mun áhrifaríkari og meira spennandi, án þess að það sé farið yfir strikið í einhverjum tæknibrellum. Aðalleikararnir, Russell Crowe og Christian Bale, sýna ótrúlega takta í hlutverkum sínum en Bale leikur smábónda sem tekur að sér að halda útlaga, Crowe, föngnum á meðan beðið er eftir lest sem mun færa hann fyrir dómstóla en Crowe reynir að beita alls kyns brögðum til að sleppa. Þetta er sígildur vestri með mjög skemmtilegum og spennandi söguþræði.

Freaky Friday
Eflaust eru margir sem ekki vita að hin geysivinsæla Disney-mynd Freaky Friday, með Jamie Lee Curtis og Lindsey Lohan í aðalhlutverkum, er í raun endurgerð á mynd sem kom út árið 1977. Myndin fjallar um unga stúlku sem skiptir um líkama við móður sína skömmu fyrir brúðkaup þeirrar síðarnefndu. Eins og áður hefur komið fram þá lék Lindsey Lohan unglingsstúlkuna í endurgerðinni en hún var þá á hátindi frægðar sinnar. Það var þó ekki síðri leikkona sem fór með sama hlutverk í upprunalegu myndinni en það var engin önnur en Jodie Foster.

The Great Gatsby
Til eru tvær kvikmyndir sem hafa verið gerðar eftir hinni sígildu skáldsögu F. Scott Fitzgerald, The Great Gatsby, og segir frá Nick Carraway sem fer frá miðvesturríkjum Bandaríkjanna til New York vorið 1922, þegar djassinn og hið ljúfa líf ræður ríkjum í borginni, og dregst fljótlega inn í heim hinna ofurríku, heim sjónhverfinga, ásta og svika. Það er erfitt að bera þessar tvær kvikmyndir saman, og nær ómögulegt færa rök fyrir því að önnur myndin sé betri en hin, því þótt þær segi sömu sögu þá er nálgun þeirra á efninu gjörólík. Sú fyrri, kom út árið 1974 með Robert Redford og Miu Farrow í aðalhlutverkum, er hefðbundnari og hógværari að öllu leyti en sú seinni. Baz Luhrman endurgerðin sem kom út árið 2013 er aftur á móti algjört augnakonfekt með frábærum leikurum í öllum hlutverkum og hvert einasta augnablik hefur verið stíliserað út í eitt. Hvorug myndin er gallalaus en þær hafa báðar marga kosti sem vega upp á móti þeim.

Texti / Hildur Friðriksdóttir

Heilbrigt og fallegt hár á veturna

Góð ráð til að halda hárinu heilbrigðu á veturna.

Nú gengur hver lægðin á fætur annarri yfir landið, okkur til lítillar skemmtunar. Þetta mikla vetrarveður, kuldi, rok og alls kyns úrkoma, getur haft töluverð áhrif á bæði húð og hár. Margar konur kannast við að hárið á þeim verði allt í senn þurrt, flókið og rafmagnað. Hér koma nokkur ráð til að halda hárinu heilbrigðu og auðveldu í meðhöndlun fram að vori – hvenær sem það nú kemur.

Hárþvotturinn
Ein algengustu mistökin í hárumhirðu eru að þvo hárið of oft, hvort sem það er vetur eða sumar, og að nota of heitt vatn. Í köldu veðri þornar hárið og húðin mun meira og það er því ekki á það bætandi. Reyndu að þvo hárið ekki oftar en þrisvar í viku og ekki hafa vatnið heitara en 37° en einnig er sniðugt að skola hárið upp úr köldu vatni í lokin til að halda rakanum í hárinu.

Réttar og góðar vörur
Heilbrigði hársins getur ráðist af hárvörunum sem þú notar og því er mikilvægt að nota réttar vörur fyrir þína hárgerð. Það eru ekki allir með á hreinu hver hárgerð þeirra er og það getur oft verið flókið að átta sig á muninum, til að mynda hvort maður er með þunnt eða fínt hár. Næst þegar þú ferð í klippingu er sniðugt að spyrja hárgreiðslumanninn þinn hvaða hárgerð þú ert með og hvaða hárvörur passa best fyrir þig.

Háspenna, lífshætta
Enn eitt hárvandamál sem veldur miklum pirringi er rafmagnað hár sem stendur allt út í loftið. Næstum allar konur eiga við þetta vandamál að stríða á einhverjum tímapunkti yfir vetrarmánuðina. Ástæðan fyrir því að hárið verður rafmagnað er að andrúmsloftið er þurrara í kulda. Gott er að nota einhvers konar hárolíu í enda hársins eftir að það hefur þornað. Í neyð er besta ráðið að spreyja smáhárspreyi í hárbursta og renna honum yfir hárið frá rótum til enda.

Ekki ofnota tæki og tól
Ofnotkun á hárblásara eða hitajárnum getur skemmt hárið og hættan er mun meiri á veturna þegar hárið er þurrt fyrir. Reyndu í lengstu lög að leyfa hárinu að þorna náttúrulega og blása það sem minnst. Gott viðmið er að leyfa hárinu að verða um það bil áttatíu prósent þurrt en nota síðan hárblásara í lokin til að móta það og gera það fallegt. Ekki hafa blásarann heldur stilltan á hæsta hita þó svo að kaldari stilling taki lengri tíma, þá missir hárið ekki jafnmikinn raka og verður fyrir minni skemmdum við volga þurrkun.

Texti / Hildur Friðriksdóttir

 

Tólf góð ráð frá stílistum

Stílistar og innanhússhönnuðir luma á snjöllum lausnum þegar kemur að því að fegra stofuna og gera hana spennandi og áhugaverða.

Stofur eru alls konar: stórar, litlar, nútímalegar, gamaldags, tómlegar, yfirhlaðnar. Þær eiga það þó flestar sameiginlegt að þar slökum við á, skemmtum okkur, tökum á móti gestum, horfum á sjónvarpið og njótum þess að vera saman. Ef þig langar að hressa upp á stofuna þína ættirðu að lesa áfram, því hér eru tólf góð ráð frá stílistum.

1. Ef þú hefur pláss, dragðu sófa og stóla örlítið frá veggjunum. Það verður meiri nánd fyrir samræður þegar húsgögnin eru nær hvert öðru og það skapar meiri kósíheit. Stofan mun líka virðast talsvert stærri.

2. Skiptu út sófaborðinu þínu fyrir annað minna sem þó er nógu stórt fyrir bók og nokkra kaffibolla og er að auki færanlegt. Þú sparar mikið pláss með þessu og það loftar betur um stofuna.

3. Að staðsetja bókahillu fyrir aftan sófann er góð hugmynd útlitslega og ekki verra að fá aukið pláss fyrir tímarit og bækur og punt. Þar sem sófinn skyggir á hilluna gætir þú geymt hluti sem þú notar sjaldnar.

4. Að blanda saman gömlum og nýjum munum er frábær leið til að auka orku í stofunni (og öðrum herbergjum).

5. Bættu jafnvægið á milli þyngri hluta og þeirra léttari til að koma í veg fyrir þyngslaleg svæði. Léttari hlutirnir, eins og sófaborð eða hliðarborð, þurfa að vera í samhljómi við þá þyngri, eins og sófa, stóla og skenka.

6. Settu upp á vegg, t.d. fyrir ofan sófann, grunna hillu eða lista sem þú getur tyllt flottum myndum á, innrömmuðum plakötum, málverkum, ljósmyndum, ekkert endilega í sömu stærð. Ef þú þreytist á þeim, geturðu auðveldlega skipt þeim út.

7. Litir eru lykillinn að því að blanda saman hlutum í samræmi. Að nota marga liti getur orsakað óróleika en ef t.d. hvíti liturinn er mest áberandi, t.d. á veggjunum og einhverjum húsgögnum, púðum eða punti, kemur það í veg fyrir að litagleðin verði yfirþyrmandi.

8. Gulllitur getur gert heilmikið fyrir hvert herbergi.

9. Að hafa allt svolítið lágt (líka listaverk á veggjum) getur verið snjallt ef þú vilt að stofan þín virki stærri. Lágt sófaborð og húsgögn, t.d. sófi með lágt bak, hafa heilmikil áhrif til að svo verði. Það er allt í lagi að hafa háa standlampa, það er bara flott að láta birtuna koma frá þeim.

10. Með því að hengja listaverkin þín ekki alltaf fyrir miðju, t.d. yfir miðjum sófanum, mun það draga athyglina að þeim og skapa áhrif hins óvænta.

11. Tveir stólar hlið við hlið þurfa ekki að vera eins. Prófaðu að setja saman tvo stóla frá svipuðu tímabili en með ólíka lögun. Það kemur skemmtilega út.

12. Ef þú ert í vafa, bættu smávegis svörtu við.

Texti / Guðríður Haraldsdóttir

Ástin kviknaði í Biggest Loser

Líf Örnu hefur gjörbreyst á tæpu ári.

Ítarlegt viðtal er við Örnu í 4. tölublaði Vikunnar 2018.

Arna Vilhjálmsdóttir sigraði keppnina Biggest Loser Ísland á síðasta ári. Hún breytti algerlega um lífsstíl, æfði oft á dag og missti í allt 60 kíló á sjö mánuðum. Mitt í öllum hasarnum fann hún líka ástina, flutti og fékk nýtt starf.

„Ég byrjaði að verða skotin í honum þegar við höfðum verið í fjórar eða fimm vikur á Bifröst. Ef hann var úti að grilla, fór ég út með fótboltann að sparka í vegg, bara til þess að geta hangið með honum, fór að vera lengur í pottinum bara til að spjalla við hann og þess háttar. Ég neitaði þessu náttúrlega staðfastlega við stelpurnar þegar þær inntu mig eftir því hvort ég væri bara ekki orðin skotin í honum. Þegar hann datt út úr keppninni varð ég alveg eyðilögð,“ segir Arna.

„Það gerðist samt ekkert á milli okkar í þáttunum, eða sem sagt á Bifröst. Eftir að ég kom heim addaði ég honum hins vegar á Snapchat og ruddist inn í líf hans með stanslausum snöppum og samtölum,“ segir hún hlæjandi. „Ég var samt með varann á mér og passaði mig á því að verða ekki of hrifin því ég var viss um að hrifningin væri aðeins mín megin en þannig hefur það alltaf verið hjá mér.“

Ítarlegt viðtal er við Örnu í 4. tölublaði Vikunnar sem kemur í verslanir á morgun, 25. janúar 2018.

Texti / Ragnhildur Aðalsteinsdóttir
Myndir / Aldís Pálsdóttir
Förðun / Hrafnhildur Runólfsdóttir með Urban Decay

Aldagömul aðferð gegn öldrun húðar

Andlitsnudd má nota til að vinna gegn öldrun húðar.

Það er fátt sem veitir jafnmikla afslöppun og vellíðan og gott nudd. Flestir þekkja það sem leið til að losa um spennu og bólgur í vöðvum líkamans en færri gera sér grein fyrir að það má einnig nýta til að sporna gegn öldrun húðar.

Eftir því sem við eldumst lætur húðin meira og meira á sjá; vefirnir slappast, andlitið missir fyllingu og hrukkur myndast. Við höfum áður fjallað um hvernig sé mögulegt að hægja á þessu ferli með réttri húðumhirðu en einnig  má ná töluverðum árangri með því einu að nudda andlitið reglulega.

Andlitsnudd eykur blóðflæði til húðar sem eykur ljóma og þéttni hennar ásamt því að byggja upp vöðvana sem spornar gegn því að hún slappist niður.

Til eru ýmsar aðferðir við andlitsnudd og sumar þeirra hafa tíðkast í margar aldir,  til dæmis er talið að Kleópatra hafi nuddað andlit sitt til að viðhalda fegurð sinni. Á 19. öld notuðu svo geishurnar í Japan svokallað shiatsu-nudd, eða punktanudd. Þá eru fingurgómarnir notaðir til að þrýsta létt á valda punkta á andlitinu sem hjálpar sogæðakerfinu að losa um stíflur og úrgangsefni sem hafa safnast fyrir í húðinni.

Andlitsnudd eykur blóðflæði til húðar sem eykur ljóma og þéttni hennar ásamt því að byggja upp vöðvana sem spornar gegn því að hún slappist niður. Eftir eingöngu nokkra daga af endurteknu nuddi er hægt að sjá mikinn mun; vöðvarnir eru slakir svo ásýndin verður afslappaðri og unglegri og húðin glóir vegna aukins blóðflæðis og næringar.

Lykillinn að góðu andlitsnuddi er að nota andlitsolíu en einnig má nota  olíuhreinsi til að koma í veg fyrir að húðin dragist til en það eykur líka upptöku virku efnanna í olíunni því þeim er nuddað svo vel inn í húðina.

Andlitsnudd lífgar ekki aðeins upp húðina heldur hefur það einnig slakandi og endurnærandi áhrif á líkama og sál. Við notum andlit okkar og vöðva þess mun meira dagsdaglega en við gerum okkur grein fyrir. Því er algengt að fólk finni fyrir ýmsum streitutengdum einkennum, til dæmis spennuhöfuðverk eða augnþreytu sem má losa um með nuddinu.

Einfalt punktanudd fyrir andlit

1. Gott er að byrja með léttum en þéttum strokum upp á við og til hliðar, yfir bæði kinnar og enni, til að undirbúa húðina. Síðan eru fingurgómar löngutangar notaðir til að þrýsta á punkta á andlitinu.
2. Þrýst er á milli augabrúna og svo á þrjá punkta upp enni að hársrót. Því næst á miðjar augabrúnir og svo aftur þrjá punkta upp enni að hársrót. Sama aðferð er svo einnig endurtekin við enda augabrúna.
3. Næst er þrýst undir augun, frá nefi og á fjóra punkta að gagnauga. Endurtakið þrisvar sinnum.
4. Síðan er þrýst á sex punkta með fram kinnbeinum þangað sem kjálki og kinnbein mætast. Endurtakið þrisvar sinnum.
5. Undir miðnesi er þrýst á fjóra punkta með fram efri vör að munnvikum. Endurtakið þrisvar sinnum.
6. Þrýst er undir miðja neðri.vör, með báðum fingrum, svo þrjá punta niður miðja höku og endurtekið þrisvar sinnum.
7. Að lokum má klípa létt í húðina með vísifingri og þumalfingri. Á enni er klipið með fram augabrún, um það bil fjögur klíp, og endurtekið þrisvar. Síðan er klipið frá miðri höku og með fram kjálka, um átta klíp að eyra.

Texti / Hildur Friðriksdóttir

Vagga indverskrar matarmenningar í Bretlandi

Í Birmingham er af nógu að taka fyrir þá sem vilja krydda aðeins tilveruna með framandi mat. Margt annað áhugavert er þar líka í boði.

Birmingham er önnur stærsta borg Bretlands, London er stærst. Borgin hefur verið í stöðugri endurnýjun undanfarna áratugi svo byggingarnar eru ýmist mjög gamlar eða ofur nýtískulegar. Í borginni býr um milljón manna og þar ríkir mikið fjölmenningarsamfélag, sama hvað sagt er á FoxNews. Hún er mjög heppilega staðsett í miðju Englands, mitt á milli London og Manchester, svo það má segja að hún brúi bilið milli Norður- og Suður-Englands.

Í Birmingham er gaman að versla því þar er glæsileg verslunarmiðstöð sem nefnist The Bullring. Hún byggir á ríkri markaðshefð en það var fyrst árið 1154 sem markaðir voru haldnir á þessu svæði. Verslun og þjónusta hefur nú vitaskuld færst í nútímalegra horf og nýjasta byggingin líkist einna helst geimskipi og er merkileg á að líta, burtséð frá öllum verslunum sem þar leynast innandyra.

Allir vísindanördar ættu að gera sér ferð í Thinktank-vísindasafnið sem er að margra mati nútímalegasta vísindasafn heims. Þar eru tíu sýningarsalir sem eru stútfullir af fróðleik og skemmtun. Hægt er að fræðast um allt frá samgöngutækni að meltingarkerfi okkar og hvernig bragðlaukarnir virka.

Þeir sem vilja heldur skemmta sér úti í náttúrunni ættu að leggja leið sína í Cannock Chase- og Wyre-skóginn. Þar er að finna Go Ape sem er einn vinsælasti skógarskemmtigarðurinn í Bretlandi. Svífðu niður á milli trjáa á vír eða sveiflaðu þér um, eins og Tarzan, í þartilgerðum rólum. Þeir sem vilja heldur njóta náttúrunnar og umhverfisins í skóginum á rólegri máta geta ferðast um á Segway sem gerir þeim kleift að sjá meira á skemmri tíma en ef þeir væru fótgangandi.

Af nógu er að taka fyrir þá sem vilja krydda aðeins tilveruna með framandi mat en Birmingham er oft lýst sem vöggu indverskrar matarmenningar í Bretlandi. Þar er að finna eitt allrabesta úrval asískra og indverskra veitingastaða og það á sérstaklega við um hinn svokallaða Balti-þríhyrning, á mótum hverfanna Sparkbrook, Balsall Heath og Moseley. Balti er þunnur karríréttur upprunninn frá svæðinu í kringum Kasmír á landamærum Indlands og Pakistan og nafnið vísar til skálarinnar sem karríið er borið fram í.

Texti  / Hildur Friðriksdóttir

Íslenskar svefnrannsóknir á heimsmælikvarða

Erna Kristín

Margir þekkja það að fá ónógan svefn. Foreldrar ungbarna sem sofa illa á nóttunni, fólk sem starfar á óhefðbundnum tímum sólarhringsins og svo þeir sem eiga erfitt með að sofna á kvöldin. Jafnvel þeir sem hrökkva upp á nóttunni eða vakna fyrr á morgnanna en þeir hefðu ætlað sér. Einnig eru margir sem stytta svefn sinn, sérstaklega á virkum dögum vegna tímaskots. Þessu fylgir oft mikil vanlíðan, syfja og þreyta sem litar þá líðan fólks allan daginn.

Erna Sif Arnardóttir doktor í svefnrannsóknum segir þetta áhyggjuefni. „Flestir fullorðnir þurfa 7-8 tíma svefn til að líða vel þó sumir komast af með minni svefn eða aðrir þurfi lengri tíma. Margir freistast til að stytta svefninn í amstri dagsins og eru jafnvel að sofa einungis 5-6 tíma á virkum dögum en bæta sér það svo upp um helgar. Ég lýsi þessu oft sem jafngildi þess að borða óhollan mat í fimm daga og reyna svo að bæta það upp með salatáti í tvo daga, auðvitað betra að sofa alltaf of stutt en ekki hollt til lengri tíma.”

Reyndu að fara að sofa á svipuðum tíma og vakna á svipuðum tíma flesta daga, bæði á virkum dögum og um helgar. Þegar svefntíma er seinkað mikið um helgar, á fólk oft erfitt með að sofna á sunnudagskvöldum og fer þreytt og illa sofið inn í vinnuvikuna.

Prófaðu þig áfram með magn svefns sem þarft. Flestir þurfa 7-8 tíma en þetta er þó einstaklingsbundið, prófaðu að reyna að auka svefntíma kerfisbundið um 15 – 30 mínútur í einu og sjáðu hvort þú finnir fyrir bætri líðan.

Ef þú átt erfitt með svefn, að sofna á kvöldin, vaknar oft upp á nóttunni eða vaknar of snemma á morgnanna, skoðaðu svefnvenjur þínar. Best er þá að sleppa því að leggja sig í eftirmiðdaginn eða dotta yfir sjónvarpi því þetta getur haft neikvæð áhrif á nætursvefninn.

Slepptu öllu koffeini frá hádegi og sjáðu hvort svefninn batni við það. Gott að prófa slökun eða hugleiðsluæfingar til að hjálpa með svefninn.

Ef þú ert glaðvakandi um miðja nótt og hefur reynt slökun til að sofna er gott að fara fram úr rúminu, setjast og lesa frammi eða gera eitthvað sem fær þig til að hætta að hugsa um svefninn en er jafnframt slakandi. Þegar þú finnur aftur til syfju, þá geturðu farið aftur upp í rúm og reynt að sofna.

Prófaðu að sleppa snjallsímanum, spjaldtölvunni og sjónvarpinu síðustu klukkustundirnar fyrir svefn. Lestu frekar, farðu í bað eða annað slakandi. Þekkt er að tækjanotkun á kvöldin ýtir undir svefnleysi, sverfngæði versnar og og fólk er lengur að sofna. Einnig getur líkamsrækt seint um kvöld seinkað svefntíma.

Ítarlegt viðtal við Ernu má lesa í síðasta tölublaði Vikunnar.

Texti / Íris Hauksdóttir
Mynd / Hákon Davíð Björnsson

Minni diskar – minni skammtastærðir

Næringarfræðingurinn Christian Bitz hvetur fólk til að borða góðan og heilsusamlegan mat, án allra öfga, skyndilausna eða samviskubits.

Christian hefur hannað sérstakan borðbúnað sem er hugsaður og hannaður þannig að hann geri fólki auðveldara að stjórna skammtastærðunum og njóta matarins.

Christian Bitz er heilmikið til lista lagt, en hann er næringarfræðingur, metsölubókahöfundur, fyrirlesari og kemur reglulega fram í hinum ýmsu sjónvarpsþáttum í Danmörku. Hugmyndafræði hans byggir meðal annars á því að fólk lifi heilsusamlegu lífi og njóti þess að borða góðan og heilsusamlegan mat, án allra öfga, skyndilausna eða samviskubits. Hann hefur líka hannað sérstakan borðbúnað sem er hugsaður og hannaður þannig að hann geri fólki auðveldara að stjórna skammtastærðunum og njóta matarins.

Hvaðan kemur áhugi þinn á heilsu og mataræði?
Ég starfaði sem fyrirsæta víðsvegar um heiminn á tíunda áratugnum. Á þeim tíma þurfti ég að hugsa vel um eigin heilsu og áhugi minn jókst á því hvernig ég gæti náð hámarksárangri með réttu mataræði og hreyfingu. Í framhaldi af því ákvað ég að fara í nám og læra meira um það hvernig mataræði hefur í raun áhrif á líf okkar á hverjum degi.

Hverjir eru lykilþættir heilbrigðs lífstíls að þínu mati?
Fyrir það fyrsta þurfum við einfaldlega að byrja að njóta matarins aftur. Stundum einblínum við of mikið á megrun í stað matar. Síðan held ég að lykillinn að góðu mataræði og betri heilsu sé að borða rétt hlutfall kolvetna og próteins. Stærsta rannsókn sinnar tegundar, DIOGENES sem stendur fyrir Diet – Obesity – Genes, hefur sýnt fram á að besta hlutfallið sé 1:2 af kolvetnum og próteini.

Hvers vegna ákvaðstu að hanna borðbúnað?
Mitt markmið er að gera heiminn örlítið heilbrigðari. Með því að hanna minn eigin borðbúnað get ég verið við kvöldmatarborðið á hverju heimili. Allar kenningar mínar og uppskriftir geta notið stuðnings af réttum borðbúnaði og saman getur það leitt til heilbrigðara lífs.

Hver er hugmyndin eða innblásturinn á bak við borðbúnaðinn?
Grunnhugmyndin var að hanna kvöldmatardisk sem rúmar minna því allar rannsóknir sýna að minni diskar þýða minni skammtastærðir. Minni skammtastærðir þýða færri hitaeiningar og fólk er ekkert endilega líklegra til að fá sér aftur á diskinn.

Skiptir það máli að borðbúnaðurinn sé fallegur?
Ég vildi bæta auknum lit, óformlegheitum og ófullkomnun við matarborðið, þess vegna ákvað ég að nota hráan efnivið sem er innblásinn af norrænni náttúru. Ég tel að það að borða af fallegum diskum auki ánægjuna. Rannsóknir hafa líka sýnt að við skynjum mat á ólíkan hátt á svörtum, hvítum eða grænum diskum. Heilsusamlegur matur hefur líka lengi fengið á sig þann stimpil að hann sé óspennandi. Borðbúnaðurinn minn getur því kannski hleypt smávegis lífi í matseldina.

Texti / Hildur Friðriksdóttir
Myndir / Úr einkasafni

Auktu hamingju þína með einföldum ráðum

Nokkur ráð til að auka hamingju sína.

Engin þörf er á því að verja stórfé eða snúa lífi sínu á hvolf til að hækka hamingjustigið hjá sér. Heilmargt er hægt að gera til að auka hamingju sína og hér eru nokkur ráð sem gott væri að tileinka sér.

Mikilvægi jákvæðra hugsana
Það er sérdeilis gott að venja sig á að hugsa jákvætt um sjálfan sig á hverjum degi, þó ekki væri nema í nokkrar sekúndur. Dást að nýju klippingunni fyrir framan spegilinn, þakka sér góðan árangur eða dugnað og annað í þeim dúr. Gott er líka að skrifa niður hugsanir sínar eins oft og hægt er og geyma þar sem aðrir sjá ekki, með því að koma þeim á blað nær maður samhengi hlutanna betur. Ekki hika við að deila góðum stundum með öðrum, til dæmis á Facebook eða snappinu.

Mikilvægi hvíldar
Hvíld er mikilvæg, ekki bara heima, heldur líka í vinnunni. Þegar mikið er að gera freistast maður til að fá sér snarl og borða það á meðan maður vinnur. Betra er að taka sér stutta pásu en enga og koma ferskari að verkefninu á eftir. Helgarfríum verja flestir í skemmtanir, ferðalög og annað slíkt en ekki má gleyma hvíldinni. Það tekur langan tíma að ná úr sér uppsafnaðri þreytu, svo verum ekkert að safna henni upp. Með því til dæmis að kíkja á tölvupóstinn sinn um leið og maður vaknar er maður sjálfkrafa kominn í vinnugírinn í stað þess að leyfa huganum að hvílast ögn lengur, eða þar til komið er til vinnu.

Litlar áskoranir
Finndu leið til að hrista upp í daglegri rútínu þinni til að hún festist ekki í fari. Lítil áskorun vikulega? Að brosa framan í einhvern ókunnugan sem gleður ekki bara viðkomandi, heldur einnig þig. Sjónvarps- eða símalaus dagur í algjörri ró. Eða klífa fjöll ef þú hefur ekki prófað það. Prófa nýjan kaffidrykk eða nýjan veitingastað. Allt til að breyta aðeins út af vananum.

Sniðugt er líka að gera alltaf eitthvað spennandi einn dag í viku. Það þarf ekki að vera stórt, kannski ilmandi freyðibað eða að byrja á nýrri bók, eitthvað sem þú getur hlakkað til alla vikuna. Föstudagar, í lok vinnuvikunnar hjá flestum, gætu verið hentugir.

Texti / Guðríður Haraldsdóttir

Fer með börn á slóðir fossa og eldfjalla

Dalla Ólafsdóttir er nýr umsjónarmaður Ferðafélags barnanna.

Dagskrá Ferðafélags barnanna, FB, fyrir árið 2018 er komin út og þar er að finna 25 ferðir fyrir börn og foreldra þeirra, bæði vinsælar ferðir frá fyrri árum og nýjungar í bland.

Af nýjungum má nefna Fjallagarpaverkefni fjölskyldunnar sem Dalla Ólafsdóttir, annar tveggja nýrra umsjónarmanna FB, segir að standi öllum börnum til boða. „Gengið verður á sex skemmtileg fjöll, Esjuna, Úlfarsfell, Helgafell í Hafnarfirði, Mosfell, Móskarðshnúka og Þorbjörn,“ lýsir hún og getur þess að fjallahetjurnar John Snorri Sigurjónsson og Vilborg Arna Gissurardóttir sláist með í för á nokkur þeirra.

Þá býður Ferðafélag barnanna í fyrsta sinn upp á eldfjalla- og fossagöngu yfir Fimmvörðuháls. „Á leiðinni upp er gengið upp tröppur með fram Skógafossi og svo fram hjá fjölda fossa þar til gist verður í Baldvinsskála á Fimmvörðuhálsi,“ segir Dalla. „Næsta dag verða ein yngstu eldfjöll landsins, Magna og Móða, skoðuð, farið yfir Heljarkamb og gengið í Þórsmörk þar sem við tekur kvöldvaka í Skagfjörðsskála í Langadal.“

„Ég hlakka mikið til. Börn eru svo opin og móttækileg þannig að það verður gaman að kynna fyrir þeim íslenska náttúru og öll ævintýrin sem hún býður upp á.“

Af öðrum ferðum má nefna sveppatínslu, kræklingaferð í Hvalfjörð og pödduskoðun í Elliðaárdal en þær ferðir eru samstarfsverkefni Ferðafélags barnanna og Háskóla Íslands. „Þetta eru allt ferðir sem eru farnar á forsendum krakka, á þeirra hraða og út frá þeirra getu,“ útskýrir hún. „Þannig að krakkar, fimm til sex ára, geta allir með góðri hvatningu tekið þátt og jafnvel yngri duglegir krakkar.“

Sjálf segist hún vera spennt að takast á við þetta nýja verkefni. „Ég hlakka mikið til. Börn eru svo opin og móttækileg þannig að það verður gaman að kynna fyrir þeim íslenska náttúru og öll ævintýrin sem hún býður upp á.“

Ferðafélag barnanna er hugsað til að hvetja börn og foreldra til útiveru og samveru í náttúru landsins og starfar innan Ferðafélags Íslands. Allar nánari upplýsingar um félagið og ferðir þess má nálgast á heimasíðu FÍ, á www.fi.is.

Myndi: Hjónin Dalla Ólafsdóttir og Matthías Sigurðarson eru nýir umsjónarmenn Ferðafélags barnanna. Hér eru þau með börnum sínum í Þórsmörk.

Texti / Roald Eyvindsson
Mynd / Dalla Ólafsdóttir

Gunnar Björn gerir glæpamynd fyrir börn

|
|

Leikstjórinn Gunnar B. Guðmundsson áformar að færa skáldsögu Þórarins Leifssonar „Maðurinn sem hataði börn“ yfir á hvíta tjaldið. Hann reiknar með að myndin verði sitt dekksta verk til þessa.

Bók Þórarins hlaut glimmrandi góða dóma þegar hún kom út 2014 og var meðal annars tilnefnd til Íslensku bókmenntaverðlaunanna í flokki barnabóka.

„Þetta er á algjöru frumstigi, þannig að ég vil nú ekki segja of mikið. Bara að sem stendur er ég að plana fyrsta uppkast og sú vinna gengur vel,“ segir leikstjórinn Gunnar B. Guðmundsson sem er um þessar mundir að þróa handrit upp úr skáldsögunni „Maðurinn sem hataði börn“ eftir Þórarinn Leifsson rithöfund.

Bók Þórarins hlaut glimmrandi góða dóma þegar hún kom út 2014 og var meðal annars tilnefnd til Íslensku bókmenntaverðlaunanna í flokki barnabóka. Hún fjallar um Sylvek, ungan innflytjanda í Reykjavík, sem ákveður upp á sitt einsdæmi að rannsaka hvarf systur sinnar vegna sinnuleysis lögreglu og kynnist á vegferð sinni alls kyns áhugaverðum persónum. Þar á meðal dularfullum leigjanda, reffilegri blaðakonu, ógurlegum steratröllum og síðast en ekki síst sturluðum raðmorðingja.

Þeir sem lesið hafa söguna vita að hún er ansi blóðug á köflum. Gunnar viðurkennir fúslega að verkið sé í dekkri kantinum. Sérstaklega í ljósi þess að það er skrifað með unga lesendur í huga. „Ég er einmitt að vinna í því að tóna ofbeldið svolítið niður í handritinu,“ segir hann. „Því þótt þetta sé auðvitað fyrst og fremst glæpasaga fyrir krakka þá er samt óþarfi að sýna allt.“

„Ég er einmitt að vinna í því að tóna ofbeldið svolítið niður í handritinu,“ segir hann. „Því þótt þetta sé auðvitað fyrst og fremst glæpasaga fyrir krakka þá er samt óþarfi að sýna allt.“

Af því þú nefnir það, hafa glæpamyndir verið gerðar fyrir krakka á Íslandi áður? „Myndir með glæpaívafi, já, en þetta yrði kannski fyrsta hreinrækaða glæpamyndin. Að því sögðu má þó ekki gleyma að saga Þórarins er fantasía líka og full af svörtum húmor og ég ætla að halda í þá þætti.“

Auk þess að skrifa handritið segist Gunnar stefna að því að leikstýra myndinni sjálfur. „Maðurinn sem hataði börn“ yrði því fyrsta kvikmynd hans í fullri lengd síðan „Gauragangur“ var frumsýnd árið 2010. Sú mynd byggir einmitt líka á bók, samnefndri skáldsögu Ólafs Hauks Símonarsonar og segir Gunnar að vinnan við gerð hennar komi nú að góðum notum í handritavinnunni.

„Þess utan hef ég verið í bandi við frábæra ráðgjafa hjá handritaverkefninu Cinekid og svo heyrt lítillega í Þórarni, sem er mjög þægilegur og rólegur yfir þessu öllu saman,“ segir hann. „Þannig að þetta er búið að vera skemmtileg vinna, sem ég vona bara að muni skila sér inn í myndina.“

Hvenær hefjast tökur? „Auðvitað er erfitt að segja til um það á þessu stigi málsins, í miðjum skrifum. En ef allt gengur að óskum erum við sennilega að tala um 2020. Það er rökrétt.“

Texti / Roald Eyvindsson
Mynd / Róbert Karl Ingimundarson

Íslenskur brimbrettamaður í stórri þáttaseríu

Heiðar Logi Elíasson, fyrsti atvinnumaðurinn á brimbretti á Íslandi, og samstarfsmaður hans, Erlendur Þór Magnússon ljósmyndari, taka þátt í gerð seríu framleiddri af risaveldinu Red Bull.

„Það er að koma hingað erlent tökulið og það ætlar að fylgja okkur Ella eftir á för okkar um landið, þar sem við leitum uppi háar og kraftmiklar öldur á afviknum stöðum til að takast á við þær. Þetta verður svona „skyggnst á bak við tjöldin“ dæmi, viðtöl í bland við senur þar sem hreinlega allt getur gerst,“ segir brimbrettakappinn Heiðar Logi Elíasson kátur í bragði.

Hann og vinur hans og samstarfsfélagi til nokkurra ára, Erlendur Þór Magnússon ljósmyndari, hafa gert samning um að koma fram í annarri seríu af þáttunum Chasing the Shot sem beinir sjónum að ljósmyndurum sem leggja allt kapp á að ná hinni fullkomnu mynd af jaðaríþróttafólki – oft við erfiðar aðstæður. Fyrri serían var meðal annars tekin upp á Hawaii og Nýja-Sjálandi og hlaut góðar viðtökur en það er risaveldið Red Bull sem framleiðir þættina.

„Þetta er náttúrlega mjög flott verkefni. Ég meina, þetta er það sem okkur Ella hefur lengi dreymt um. Að gera okkar eigið „stöff“.“

Spurður um hvernig það hafi komið til að þeir félagar hafi verið fengnir til að koma fram í þáttunum segir Heiðar Logi hugmyndina hafa sprottið upp í samræðum sem hann átti við aðila innan Red Bull í fyrra. Hún hafi smám saman undið upp á sig og sé nú að verða að veruleika. „Þetta er náttúrlega mjög flott verkefni,“ segir hann, auðheyrilega spenntur. „Ég meina, þetta er það sem okkur Ella hefur lengi dreymt um. Að gera okkar eigið „stöff“.“

Í þeim stóru verkefnum sem þeir félagar hafi hingað til komið að hafi þeir meira verið hluti af teymi, eins og í nýlegri heimildamynd á Netflix sem kallast Under an Arctic Sky og fjallar bæði um þá og annað brimbrettafólk sem er að eltast við hina fullkomnu öldu. Í Chasing the Shot verði fókusinn hins vegar alfarið á þá. Auk þess hafi þeir miklu frjálsari hendur með efnistök. „Þannig að við ætlum að nota tækifærið og sýna allt sem við erum að bralla saman. Hluti sem við höfum aldrei sýnt á „vídeó“ áður. Fólk á eftir að fá alveg nýja sýn inn í það sem við erum að gera.“

Að sögn Heiðars er tökuliðið væntanlegt til landsins í febrúar og er áætlað að þættirnir verði aðgengilegir í sumar. Ekki sé búið að negla niður tökustaði að svo stöddu. Þeir ráðist af veðráttunni. „Við förum bara þangað sem stormarnir og háu öldurnar verða hverju sinni,“ segir hann hress.

Mynd: Heiðar Logi Elíasson hefur getið sér gott orð sem brimbrettamaður en hægt er að fylgjast með ævintýrum hans á bæði Snapchat og Instagram undir notendanafninu heidarlogi.

Texti / Roald Eyvindsson
Mynd / Aldís Pálsdóttir

Úr Elly í Rocky Horror

Björn Stefánsson leikur Riff Raff í Rocky Horror.

Leikarinn og trommuleikarinn Björn Stefánsson, einnig þekktur sem Bjössi í Mínus, hefur nú bæst í leikararhóp söngleiksins Rocky Horror sem verður frumsýndur í Borgarleikhúsinu í mars. Björn mun bregða sér í hlutverk ískalda einkaþjónsins Riff Raffs, sem upphaflega var leikinn af Richard O´Brien, höfundi verksins, í bíómynd byggðri á verkinu. Til stóð að leikarinn Atli Rafn Sigurðarson færi með hlutverk persónunnar en eins og kunnugt er var honum sagt upp störfum í leikhúsinu í desember í fyrra.

Björn, sem vakið hefur athygli fyrir leik sinn í Elly og í kvikmyndinni Rökkur, var því fenginn til að leysa Atla Rafn af hólmi og hefur hann undanfarnar vikur verið að æfa af krafti með leikhópi Rocky Horror, sem skartar stórstjörnum á borð við Pál Óskar og Val Frey Einarsson. Miklar vonir eru bundar við uppsetningu leikhússins á verkinu enda er Rocky Horror einn vinsælasti söngleikur allra tíma.

Texti / Roald Eyvindsson
Mynd / Skot úr myndinni Rökkur þar sem Björn fór með annað aðalhlutverkið.

Metaðsókn í Sundhöll Reykjavíkur

Sundhöll Reykjavíkur aldrei vinsæll en nú.

Óhætt er að segja að Sundhöllin í Reykjavík hafi aldrei verið jafnvinsæl og nú. Hvorki meira né minna en tæplega 36 þúsund manns lögðu leið sína í laugina í desember í fyrra eftir að hún var opnuð á nýjan leik 3. desember eftir miklar breytingar. En til samanburðar má geta að tæplega níu þúsund gestir sóttu Sundhöllina í desember árið á undan.

„Þetta er algjör sprengja miðað við fyrri ár,“ segir Brá Guðmundsdóttir, þjónustu- og mannauðsráðgjafi hjá Laugardagslaug og Sundhöll Reykjavíkur. „Við erum að tala um metaðsókn.“

Brá segir að breytingar á Sundhöllinni, sem fela meðal annars í sér byggingu viðbyggingar og útisvæðis, hafi augljóslega hitt í mark. Enda séu flestir á einu máli um að þær séu vel heppnaðar. Þá sýni ferðamenn lauginni aukinn áhuga, sem eigi þátt í þessari miklu aðsókn. Með sama áframhaldi megi reikna með metaðsókn í Sundhöllina á árinu. „Ég býst við því og að gamla sólbaðsaðstaðan og nýja útivistarsvæðið komi þá sterkt inn í veðursældinni í sumar,“ segir hún glaðlega.

Að sögn Brár hófust framkvæmdir við nýju útilaugina á vormánuðum 2015 og var Sundhöllin lokuð vegna framkvæmda frá júní 2017 fram til desember sama ár. VA arkitektar eiga heiðurinn af viðbótunum en Guðjón Samúelsson, þáverandi húsameistari, hannaði gömlu höllina.

Texti / Roald Eyvindsson
Mynd / Íþrótta- og tómstundasvið Reykjavíkur

Lykillinn að góðum rakstri

Rakstur er mikilvægur þáttur í húðumhirðu karla. Hér eru nokkur góð ráð.

Mjúkt skegg tryggir betri rakstur
Lykillinn að góðum rakstri er að tryggja það að skeggið sé vel blautt áður en hafist er handa. Þurrt skegg er nefnilega mun harðara sem gerir það að verkum að raksturinn er erfiðari og rakvélarblöðin slitna fyrr. Best er að skella sér í heita sturtu og raka sig svo eftir hana, en ef ekki gefst tími til að fara í sturtu er gott að setja vel heitan og rakan þvottapoka á andlitið í um það bil tvær mínútur fyrir raksturinn. Þetta mýkir skeggið, ásamt því að örva og opna húðina, þannig að raksturinn verður léttari og útkoman betri.

Sápa og bursti
Notið raksápu sem inniheldur mikið af rakagefandi og smyrjandi efnum, til dæmis glyseríni og silíkoni, eða góðan anditshreinsi sem freyðir vel. Gæðaraksápur mynda þykka og mjúka froðu án aðstoðar freyðiefna á borð við súlföt sem geta þurrkað húðina. Ef tími gefst er gott að leyfa raksápunni að vera um stund á húðinni áður en raksturinn hefst svo skeggið verði eins mjúkt og mögulegt er. Þótt sumar raksápur megi hæglega bera á með fingrunum jafnast ekkert á við að nota góðan rakbursta, eins og alvörurakarar nota, því hann ýfir skegghárin þannig að raksturinn verður enn fínni en annars.

Vertu með, ekki á móti
Við raksturinn er mikilvægt að nota góða rakvél, hvort sem um ræðir rafmagnsrakvél eða sköfu. Sköfu á alltaf að renna létt yfir hörundið, ekki þrýsta fast að, og strekkja vel á húðinni á meðan. Mikilvægt er að hreinsa rakvélarblaðið oft og vel meðan á rakstrinum stendur, svo að ekki safnist hár á milli blaðanna. Ef sápan þornar þarf aðeins að nota meira vatn og vinna froðuna aftur upp með burstanum, ekki nota meiri sápu. Það á alltaf að raka í sömu stefnu og skeggið vex, aldrei á móti. Að raka á móti skeggvextinum getur valdið sviða og inngrónum hárum í andliti ásamt því að auka líkurnar á því að maður skeri sig við raksturinn. Til að tryggja góðan rakstur getur verið gott að setja aftur á sig raksápu og raka aðra umferð en þá þvert á skeggvöxtinn, en varast samt ofrakstur.

Eftir rakstur og sótthreinsun
Meðferð eftir raksturinn er ekki síður mikilvæg og undirbúningurinn. Strax að loknum rakstri er gott að skvetta dálitlu köldu vatni á andlitið til loka húðinni aftur. Margir klikka oft á því, bera strax á sig rakspíra og uppskera mikinn sviða. En það er ekki fyrr en að húðinni hefur verið lokað á þennan hátt sem á að bera á sig rakspíra, helst einhvern sem inniheldur lítið sem ekkert alkóhól, eða rakakrem (after shave balm) til sótthreinsunar og mýkingar.

Viðhald á tækjum og tólum
Eftir hverja notkun þarf að hreinsa bæði burstann og rakvélina. Hristið vatn úr burstanum, ekki vinda hann, og geymið hann hangandi svo hárin vísi niður, en það kemur í veg fyrir að raki safnist fyrir og valdi hárlosi. Bitlaust eða skítugt blað er ein meginástæðan fyrir óþægilegum rakstri og skurðum. Rakvélarbrýni, eins og Razorpit, geta þá komið að góðum notum og gera manni kleift að spara í kaupum á rakvélarblöðum. Það eykur notkun hvers rakvélarblaðs frá tíu rökstrum upp í allt að hundrað rakstra að hreinsa það og brýna svo að það verði hárbeitt á ný.

Texti / Hildur Friðriksdóttir

Lítil kríli með viðkvæma húð

Góð ráð fyrir húðumhirðu barna.

Það er fátt yndislegra en silkimjúk og ilmandi húð ungbarna. Hún er samt miklu þynnri og viðkvæmari en húð okkar fullorðna fólksins. Þess vegna þarfnast hún góðrar umhirðu og verndar fyrsta árið. Hér eru nokkur góð ráð fyrir húðumhirðu barna.

Bleyjubossar
Þrífa þarf bossann á bleyjubörnum reglulega því það eru efni í þvagi sem geta brennt viðkvæma rassa, rétt eins og kúkur. Sumir kjósa að nota þartilgerða blautklúta en það er nóg að nota bara rakan þvottapoka eða svampklút. Ef bleyjuútbrot fara að láta á sér kræla er mikilvægt að þrífa svæðið við hver bleyjuskipti, þerra það vel og bera síðan Zink-krem á rauða rassa til að koma í veg fyrir frekari útbrot. Einnig er gott að viðra bossann eins oft og mögulegt er.

Þvottur, þvottur og meiri þvottur
Það er ekki síður nauðsynlegt að hugsa út í hvernig við þvoum föt barna. Fötin liggja á viðkvæmri húð barnsins allan daginn og því er mikilvægt velja þvottaefni sem eru mild og örugg. Margir mæla með að sleppa mýkingarefnum alveg því þau innihalda oft mikið magn ilmefna sem eru ofnæmisvaldandi.

Margir foreldrar hafa áhyggjur af því að þeir þurfi að þvo barnafötin sér. Vissulega er þess þörf ef þú notar sterkari þvottaefni og mýkingarefni á annan þvott heimilisins. Hví ekki nota tækifærið og byrja að nota mildari, sem og umhverfisvænni, þvottaefni fyrir allan þvott? Afraksturinn gæti komið þér á óvart.

Lítil, skrítin skán
Algengt er að það myndist skán í hársverði ungbarna sem er gulbrúnt fitukennt hrúður. Þessi skán er algengust ofan á hvirfli en getur einnig verið á öðrum afmörkuðum blettum eða um allan hársvörðinn. Skánin er hættulaust ástand sem varir yfirleitt ekki lengi. Þetta veldur barninu ekki óþægindum og verður minna áberandi eftir því sem meira hár vex á höfði barnsins.

Alls ekki reyna að kroppa skánina í burtu án þess að mýkja hana upp áður, þá gæti farið að blæða úr hársverðinum og myndast sýking. Best er að bera góða jurtaolíu, svo sem möndlu-, jarðhnetu- eða ólífuolíu, í hársvörðinn áður en barnið fer að sofa. Þá mýkist skánin yfir nótt og morguninn eftir er notuð fíngerð greiða eða bursti til að bursta skánina varlega, ekki fara of nærri hársverðinum þannig að höfuðleðrið ertist. Að lokum þarf að þvo höfuðið og þá skolast hrúðrið að mestu leyti burtu. Þetta gæti þó þurft að endurtaka nokkrum sinnum.

Vanda valið á kremum
Það er mjög mikilvægt að velja vandlega það sem borið er á húð ungra barna. Það er staðreynd að mörg efni geta valdið ofnæmi eða aukið hættu á húðvandamálum síðar á ævinni. Yfirleitt þarf ekki að bera neitt sérstaklega á húð barns en stundum fá börn exem eða mikinn þurrk, sérstaklega yfir vetrartímann. Þá er mikilvægt að nota krem sem hafa verið ofnæmisprófuð í þaula og innihalda hvorki ilmefni né önnur skaðleg efni. Fyrirtæki eins og Eucerin, Neutral og Weleda framleiða mjög góðar vörur sem eru sérstaklega ætlaðar fyrir ungbörn. Einnig geta börn fengið svokallaðar hormónabólur á andlitið vegna hormóna í móðurmjólkinni. Þessar bólur eru fullkomlega eðlilegar og hverfa af sjálfu sér á nokkrum vikum svo best er að láta þær alveg í friði. Þær ná oft hámarki um sex vikna aldur en fara svo að hverfa.

Texti / Hildur Friðriksdóttir

Sex einfaldar leiðir til að bæta líðan þína

|
|

Heilbrigður lífsstíll byggist á góðum venjum sem verða að rútínu.

Það er þó hægara sagt en gert. Hér eru sex einfaldar leiðir til að bæta líðan þína og gera líf þitt árangursríkra og betra.

Farðu snemma á fætur og af stað.

1. Farðu snemma á fætur og af stað
Á morgnana erum við orkumest og athygli okkar er skörpust svo sá tími er tilvalinn til að taka á þeim hlutum sem okkur finnst erfiðastir eða krefjast meiri viljastyrks – eins og til dæmis að fara í ræktina. Ef þú átt erfitt með að stunda reglulega líkamsrækt þá gæti það verið vegna þess hvaða tíma dags þú ert að fara. Eftir langan vinnudag eru flestir þreyttir og svangir svo það síðasta sem þá langar að gera er að skella sér út að skokka. Þess vegna er svo gott að fara á morgnana fyrir vinnu því þá er það bara búið og margir segjast finna aukna orku það sem eftir er dagsins eftir að hafa byrjað hann á hreyfingu.

2. Beislaðu sjálfstýringuna
Góðir ávanar hafa þann kost að með tímanum verða þeir sjálfkrafa hluti af rútínu þinni sem þýðir að þú notar minni hugarorku í að framkvæma þá. Þannig nær einmitt íþróttafólk að halda sér í góðu formi og þjálfun en þetta á ekkert síður við okkur meðaljóna. Það tekur um það bil tuttugu og einn dag að venja sig á eitthvað nýtt, en getur auðvitað tekið lengri tíma þannig að það verði okkur eðlislægt. Það þýðir að ef þú átt erfitt með að fá þér ekki sætindi seinnipartinn þá muntu smám saman hætta að hugsa um það og eftir þrjár vikur verður þú jafnvel alveg laus við löngunina.

3. Skoðaðu góðu ávana þína
Ein besta leiðin til að losa sig við slæma vana er að bæta góðum ávana við þá sem þú þegar hefur. Til dæmis ef þú ert vön að fá þér kaffibolla á morgnana getur þú tekið upp á því að fá þér grænt te eða heitt vatn með sítrónu. Þá skiptir þú út slæmum vana fyrir góðan. Þar sem þú færð enn þá heitan drykk á morgnana er breytingin auðveldari en að hætta bara að drekka kaffið. Síðan getur þú haldið áfram og vanið þig á tíu mínútur af hugleiðslu með drykknum. Smám saman verður til keðja af góðum venjum sem er í raun það sem heilbrigður lífsstíll gengur út á.

4. Skrifaðu hlutina niður
Það sem við skrifum niður er oft betur greipt í minni okkar en það sem við hugsum eða heyrum. Við erum öll af vilja gerð að standa okkur en með því að skrifa áætlanir okkar niður verðum við ósjálfrátt ábyrgari gagnvart þeim og líklegri til að standa við þær. Þó að tæknin sé til margs góðs þá hefur það ekki sömu áhrif að skrifa hlutina niður í snjallsíma eða tölvu. Sestu heldur niður og skrifaðu slæma ávana niður á blað ásamt því hvernig þú ætlar að losa þig við þá. Hengdu listann svo upp þar sem þú sérð hann reglulega.

5. Taktu á afsökununum
Það að vera stöðugt að afsaka slæma ávana getur staðið í vegi fyrir því að þú takir upp góða vana í staðinn. Ef við styðjumst aftur við dæmið um kaffibollann, þegar þú vaknar þreytt á morgnana eftir erfiða vinnuviku þá er auðvelt að réttlæta fyrir sjálfri sér að þú eigir kaffibollann skilið og að þú munir halda áfram í bindindinu á morgun. Vandinn er að sá morgundagur kemur aldrei og fyrr en varir ertu byrjuð að drekka kaffi á hverjum morgni aftur. Í stað þess að fara aftur í sama farið getur þú ákveðið að fá þér svart te í þetta skiptið, þannig færðu verðlaun. Sama gildir um líkamsræktina, ef þú getur ekki farið klukkan hálf sjö í spinning farðu þá á fætur klukkan hálf átta og farðu út að skokka í hálftíma. Þá heldur þú þér við efnið.

6. Sjáðu það fyrir þér
Það er auðvelt að gleyma nýjum venjum og ástæðan fyrir því að það er erfitt að losna við slæma vana er að við erum búin að gera þá aftur og aftur í langan tíma. Til þess að auðvelda sér hlutina er hægt að búa til sjónrænar áminningar. Ef þú vilt venja þig á að nota tannþráð á morgnana settu þá minnismiða á baðherbergisspegilinn. Ef þú vilt fara í ræktina á morgnana hafðu þá líkamsræktarfötin tilbúin við hlið rúmsins, eða sofðu í þeim – það virkar. Þessar litlu áminningar munu minna þig á vanann þar til þú þarft ekki lengur á þeim að halda og vaninn er orðinn hluti af rútínunni.

Texti / Hildur Friðriksdóttir

 

Svona innréttarðu litla stofu

Góð ráð fyrir þá sem eru með litlar stofur.

Þegar þú innréttar litla stofu reyndu að komast af með sem fæsta hluti. Þannig kemur þú í veg fyrir að hún verði óreiðukennd. Gott er að horfa reglulega yfir hana með gagnrýnum augum og fjarlægja það sem þér finnst ofaukið.

Gott er að láta lofta sem mest um húsgögnin. Ekki klessa til dæmis borði fast upp við hliðina á sófanum, eins og gert er á þessari mynd. Hafðu heldur smábil á milli þegar þú kemur því við.

Of mikil litadýrð getur verið yfirþyrmandi í lítilli stofu. Mörg mynstur eru heldur ekki æskileg. Hvít málning á veggjum er góð byrjun.

Til eru sniðug húsgögn með tvöfalt notagildi; fínir sófar sem eru líka svefnsófar, stólar/kollar með geymslurými, sófaborð með hillum á hliðunum, lítil borð sem gætu einnig þjónað sem sæti og svo framvegis. Þegar plássið er lítið þarf stundum að fórna einhverju til að lofti betur um það sem eftir er.

Stærri húsgögn ættu að standa aftast í stofunni frá dyrunum séð – en ekki staðsett við innganginn. Þá gæti þér fundist sem húsgögnin þrengi að þér. Settu þau þyngstu fjærst dyrunum og komdu hinum fyrir í góðu jafnvægi við þau.

Ef sami litur er á t.d. veggnum og sófanum mun sófinn verða minna áberandi og ekki grípa athyglina jafnauðveldlega og ef hann væri í öðrum lit. Það getur verið mjög flott að láta húsgögnin falla inn í vegginn á þennan hátt, svona á meðan maður ofgerir ekki. Þú getur líka notað málningu til að „fela“ bitana í loftinu, ofnana og annað sem þér finnst gefa stofunni draslaralegan blæ.

Haltu yfirborðinu hreinu og lausu við ónauðsynlegt dót. Með því að takmarka það sem þú geymir ofan á hillum, skápum, borðum og í gluggakistum loftar svo miklu betur um stofuna. Þú þarft alls ekki að fjarlægja allt, fækkaðu bara þessum hlutum. Allt verður svo miklu snyrtilegra. Þeir sem ætla að selja íbúðina sína ættu að hafa þetta í huga – áhrifin þegar inn í stofuna (íbúðina) er komið eru svo miklu betri á væntanlega kaupendur en þegar allt er ofhlaðið, hún virkar einnig stærri.

Veldu listaverk í meðalstærð á veggina í stað risastórra verka. Stórar myndir geta verið afar flottar en yfirþyrmandi í litlu rými. Mörg verk saman á vegg geta verið óreiðukennd ef þau eru of stór eða mjög misstór. Einhver regla verður að vera, að láta efri línur eða neðri mætast. Ef hengt er upp af algjöru handahófi njóta myndirnar sín ekki sem skyldi.

Falleg gluggatjöld geta skapað ljúfa og mjúka stemningu í stofunni en í litlu rými og nálægt húsgögnunum gleypa þau alveg stofuna. Gólfmottur skipta líka máli, of margar litlar mottur geta látið stofuna virka draslaralega. Rýmið sýnist allt svo miklu opnara ef hófsemi er gætt. Þú getur líka sleppt því að nota gluggatjöld. Rimla- eða rúllugluggatjöld geta verið fín lausn í litlum stofum.

Gott er að gera sem mest úr dagsbirtunni. Blóm og vasar í gluggakistum geta verið falleg en skyggja á birtuna.

Speglar eru magnaðir í þeim tilgangi að láta herbergi virðast stærra. Spegill á réttum stað gerir ótrúlega mikið fyrir lítil rými og getur gjörbreytt stofunni þinni.

Fleiri lampar og góð lýsing út í hvert horn er einnig af hinu góða.

Texti / Guðríður Haraldsdóttir

Siggi skyr opnar dyrnar: Úr tilraunastarfsemi í stórveldi

Sigurður Kjartan Hilmarsson, eða Siggi skyr eins og hann er yfirleitt kallaður, hóf tilraunir með skyrgerð í eldhúsinu hjá sér í New York eftir gamalli uppskrift sem móðir hans sendi honum fyrir rúmum áratug.

Núna fæst skyrið í um 25 þúsund verslunum í Bandaríkjunum og fyrirhugaður er mikill vöxtur á næstu misserum. „Það verður engin breyting á okkar starfsemi. Við munum halda áfram að starfa héðan frá New York og sama góða starfsfólkið verður mér við hlið,“ segir Siggi  og hrósar starfsfólkinu

Þetta er einhver ótrúlegasta frumkvöðlasaga Íslendings í seinni tíð og hvernig varan varð til á löngum tíma með dugnaði, klókindum og hugviti

Franski mjólkurvörurisinn Lactalis keypti fyrirtækið hans Sigga á dögunum. Kaupverðið hefur ekki verið gefið upp og er trúnaður milli kaupanda og seljenda, en það hleypur á tugum milljarða. „Fyrirtækið hefur átt hug minn allan frá fyrsta degi,“ segir Siggi.

Siggi skyr verður í ítarlegu viðtali við Magnús Halldórsson blaðamann í Mannlífi.  Blaðið kemur út á morgun föstudaginn 26. janúar og er dreift ókeypis inn á heimili á höfuðborgarsvæðinu.  Mannlíf er gefið út í samstarfi við Kjarnann.

Burstaþvottur tryggir fallegri förðun

Regluleg þrif á förðunarburstum er ávísun á betri förðun.

Mikilvægt er að þrífa förðunarburstana sína, jafnvel þótt maður sé bara að nota þá sjálfur, því það tryggir fallegri förðun en er jafnframt mjög mikilvægur þáttur í húðumhirðunni.

Það er mjög mikilvægt að þrífa förðunarburstana sína, jafnvel þótt maður sé bara að nota þá sjálfur, því það tryggir fallegri förðun en er jafnframt mjög mikilvægur þáttur í húðumhirðunni. Þegar við málum okkur þá geta bakteríur og önnur óhreinindi safnast fyrir í burstunum, sem geta valdið stíflum og bólum í húðinni seinna meir.

Hægt er að fá hreinsivökva fyrir bursta frá ýmsum snyrtivörumerkjum og það er mjög fljótlega leið til þess að þrífa og sótthreinsa bursta. Smávegis af hreinsivökvanum er þá sett í skál, burstanum dýft ofan í og svo nuddað á eldhúspappír eða hreina tusku. Megininnihaldsefni vökvans er alkóhól sem getur þurrkað burstana. Þess vegna er nauðsynlegt að djúphreinsa þá líka reglulega með sápu og vatni.

Góð regla er að þvo burstana á tveggja vikna fresti með mildri sápu eða barnasjampói, einnig getur verið gott að nota uppþvottalög á þá bursta sem eru notaðir í fljótandi farða því uppþvottalögur leysir betur upp fituna í farðanum.

Best er að þrífa burstana við vaskinn með smávegis af sápu eða sjampói í lítilli skál.  Hverjum bursta er þá dýft í sápuna, nuddað aðeins inn í lófann til að láta sápuna freyða og svo er burstinn að lokum skolaður með volgu vatni. Að lokum er gott að setja smáhárnæringu í þá bursta sem eru úr náttúrulegum hárum, leyfa henni að bíða aðeins og skola hana svo úr, þá haldast burstarnir mjúkir og fallegir.

Þegar bursti eru skolaður er mikilvægt að snúa honum niður undir bununni til að passa að ekkert vatn komist í skaftið. Þá getur límfestingin leyst upp, burstinn byrjað að „fara úr hárum“ og að lokum dottið í sundur. Af sömu ástæðu er best að láta burstana liggja flata á handklæði meðan þeir þorna, ekki hafa þá upprétta, og enn betra er að leyfa þeim að hanga aðeins út fyrir borðbrún svo loft nái að leika um þá.

Texti / Hildur Friðriksdóttir

Ekkert lát á endurgerðum

Ekkert lát virðist ætla að verða á endurgerðum Hollywood-kvikmyndum á næstunni. Hér er listi yfir nokkrar sígildar.

Ocean’s Eleven, Twelve, Thirteen og nú Ocean’s Eight!
Í hinni upprunalegu Ocean’s 11 mynd mátti sjá hina óviðjafnanlegu Rat Pack, Frank Sinatra, Dean Martin og Sammy Davis Jr. í aðalhlutverkum og myndin fékk á sínum tíma góðar viðtökur. Sagan segir frá Danny Ocean sem vill fremja stærsta rán sögunnar og til þess safnar hann saman ellefu manna úrvalsliði. Þegar ráðist var í endurgerð myndarinnar árið 2001 var öllum ljóst að leikaravalið þurfti að sambærilegt og það tókst svo sannarlega með George Clooney, Brad Pitt og Matt Damon. Þó að sígilda útgáfan sé alls ekki léleg þá verður að viðurkennast að sú nýrri hefur mun meira skemmtanagildi, er bæði fyndnari og meira spennandi, og verður því yfirleitt ofan á í samanburðinum. Nú er von á fjórðu myndinni og þar verða skærustu kvenstjörnur Hollywood í aðalhlutverkum, meðal annars Cate Blanchett, Sandra Bullock og Anne Hathaway.

3:10 to Yuma
Þó svo að sumir ríghaldi með klassísku útgáfunni af 3:10 to Yuma sem kom út árið 1957 eru flestir á sama máli um að endurgerð James Mangold frá árinu 2007 sé mun betri. Það er einkum vegna þess að tækninni hefur fleygt töluvert fram á þessum fimmtíu árum og því er hasarinn í myndinni mun áhrifaríkari og meira spennandi, án þess að það sé farið yfir strikið í einhverjum tæknibrellum. Aðalleikararnir, Russell Crowe og Christian Bale, sýna ótrúlega takta í hlutverkum sínum en Bale leikur smábónda sem tekur að sér að halda útlaga, Crowe, föngnum á meðan beðið er eftir lest sem mun færa hann fyrir dómstóla en Crowe reynir að beita alls kyns brögðum til að sleppa. Þetta er sígildur vestri með mjög skemmtilegum og spennandi söguþræði.

Freaky Friday
Eflaust eru margir sem ekki vita að hin geysivinsæla Disney-mynd Freaky Friday, með Jamie Lee Curtis og Lindsey Lohan í aðalhlutverkum, er í raun endurgerð á mynd sem kom út árið 1977. Myndin fjallar um unga stúlku sem skiptir um líkama við móður sína skömmu fyrir brúðkaup þeirrar síðarnefndu. Eins og áður hefur komið fram þá lék Lindsey Lohan unglingsstúlkuna í endurgerðinni en hún var þá á hátindi frægðar sinnar. Það var þó ekki síðri leikkona sem fór með sama hlutverk í upprunalegu myndinni en það var engin önnur en Jodie Foster.

The Great Gatsby
Til eru tvær kvikmyndir sem hafa verið gerðar eftir hinni sígildu skáldsögu F. Scott Fitzgerald, The Great Gatsby, og segir frá Nick Carraway sem fer frá miðvesturríkjum Bandaríkjanna til New York vorið 1922, þegar djassinn og hið ljúfa líf ræður ríkjum í borginni, og dregst fljótlega inn í heim hinna ofurríku, heim sjónhverfinga, ásta og svika. Það er erfitt að bera þessar tvær kvikmyndir saman, og nær ómögulegt færa rök fyrir því að önnur myndin sé betri en hin, því þótt þær segi sömu sögu þá er nálgun þeirra á efninu gjörólík. Sú fyrri, kom út árið 1974 með Robert Redford og Miu Farrow í aðalhlutverkum, er hefðbundnari og hógværari að öllu leyti en sú seinni. Baz Luhrman endurgerðin sem kom út árið 2013 er aftur á móti algjört augnakonfekt með frábærum leikurum í öllum hlutverkum og hvert einasta augnablik hefur verið stíliserað út í eitt. Hvorug myndin er gallalaus en þær hafa báðar marga kosti sem vega upp á móti þeim.

Texti / Hildur Friðriksdóttir

Heilbrigt og fallegt hár á veturna

Góð ráð til að halda hárinu heilbrigðu á veturna.

Nú gengur hver lægðin á fætur annarri yfir landið, okkur til lítillar skemmtunar. Þetta mikla vetrarveður, kuldi, rok og alls kyns úrkoma, getur haft töluverð áhrif á bæði húð og hár. Margar konur kannast við að hárið á þeim verði allt í senn þurrt, flókið og rafmagnað. Hér koma nokkur ráð til að halda hárinu heilbrigðu og auðveldu í meðhöndlun fram að vori – hvenær sem það nú kemur.

Hárþvotturinn
Ein algengustu mistökin í hárumhirðu eru að þvo hárið of oft, hvort sem það er vetur eða sumar, og að nota of heitt vatn. Í köldu veðri þornar hárið og húðin mun meira og það er því ekki á það bætandi. Reyndu að þvo hárið ekki oftar en þrisvar í viku og ekki hafa vatnið heitara en 37° en einnig er sniðugt að skola hárið upp úr köldu vatni í lokin til að halda rakanum í hárinu.

Réttar og góðar vörur
Heilbrigði hársins getur ráðist af hárvörunum sem þú notar og því er mikilvægt að nota réttar vörur fyrir þína hárgerð. Það eru ekki allir með á hreinu hver hárgerð þeirra er og það getur oft verið flókið að átta sig á muninum, til að mynda hvort maður er með þunnt eða fínt hár. Næst þegar þú ferð í klippingu er sniðugt að spyrja hárgreiðslumanninn þinn hvaða hárgerð þú ert með og hvaða hárvörur passa best fyrir þig.

Háspenna, lífshætta
Enn eitt hárvandamál sem veldur miklum pirringi er rafmagnað hár sem stendur allt út í loftið. Næstum allar konur eiga við þetta vandamál að stríða á einhverjum tímapunkti yfir vetrarmánuðina. Ástæðan fyrir því að hárið verður rafmagnað er að andrúmsloftið er þurrara í kulda. Gott er að nota einhvers konar hárolíu í enda hársins eftir að það hefur þornað. Í neyð er besta ráðið að spreyja smáhárspreyi í hárbursta og renna honum yfir hárið frá rótum til enda.

Ekki ofnota tæki og tól
Ofnotkun á hárblásara eða hitajárnum getur skemmt hárið og hættan er mun meiri á veturna þegar hárið er þurrt fyrir. Reyndu í lengstu lög að leyfa hárinu að þorna náttúrulega og blása það sem minnst. Gott viðmið er að leyfa hárinu að verða um það bil áttatíu prósent þurrt en nota síðan hárblásara í lokin til að móta það og gera það fallegt. Ekki hafa blásarann heldur stilltan á hæsta hita þó svo að kaldari stilling taki lengri tíma, þá missir hárið ekki jafnmikinn raka og verður fyrir minni skemmdum við volga þurrkun.

Texti / Hildur Friðriksdóttir

 

Tólf góð ráð frá stílistum

Stílistar og innanhússhönnuðir luma á snjöllum lausnum þegar kemur að því að fegra stofuna og gera hana spennandi og áhugaverða.

Stofur eru alls konar: stórar, litlar, nútímalegar, gamaldags, tómlegar, yfirhlaðnar. Þær eiga það þó flestar sameiginlegt að þar slökum við á, skemmtum okkur, tökum á móti gestum, horfum á sjónvarpið og njótum þess að vera saman. Ef þig langar að hressa upp á stofuna þína ættirðu að lesa áfram, því hér eru tólf góð ráð frá stílistum.

1. Ef þú hefur pláss, dragðu sófa og stóla örlítið frá veggjunum. Það verður meiri nánd fyrir samræður þegar húsgögnin eru nær hvert öðru og það skapar meiri kósíheit. Stofan mun líka virðast talsvert stærri.

2. Skiptu út sófaborðinu þínu fyrir annað minna sem þó er nógu stórt fyrir bók og nokkra kaffibolla og er að auki færanlegt. Þú sparar mikið pláss með þessu og það loftar betur um stofuna.

3. Að staðsetja bókahillu fyrir aftan sófann er góð hugmynd útlitslega og ekki verra að fá aukið pláss fyrir tímarit og bækur og punt. Þar sem sófinn skyggir á hilluna gætir þú geymt hluti sem þú notar sjaldnar.

4. Að blanda saman gömlum og nýjum munum er frábær leið til að auka orku í stofunni (og öðrum herbergjum).

5. Bættu jafnvægið á milli þyngri hluta og þeirra léttari til að koma í veg fyrir þyngslaleg svæði. Léttari hlutirnir, eins og sófaborð eða hliðarborð, þurfa að vera í samhljómi við þá þyngri, eins og sófa, stóla og skenka.

6. Settu upp á vegg, t.d. fyrir ofan sófann, grunna hillu eða lista sem þú getur tyllt flottum myndum á, innrömmuðum plakötum, málverkum, ljósmyndum, ekkert endilega í sömu stærð. Ef þú þreytist á þeim, geturðu auðveldlega skipt þeim út.

7. Litir eru lykillinn að því að blanda saman hlutum í samræmi. Að nota marga liti getur orsakað óróleika en ef t.d. hvíti liturinn er mest áberandi, t.d. á veggjunum og einhverjum húsgögnum, púðum eða punti, kemur það í veg fyrir að litagleðin verði yfirþyrmandi.

8. Gulllitur getur gert heilmikið fyrir hvert herbergi.

9. Að hafa allt svolítið lágt (líka listaverk á veggjum) getur verið snjallt ef þú vilt að stofan þín virki stærri. Lágt sófaborð og húsgögn, t.d. sófi með lágt bak, hafa heilmikil áhrif til að svo verði. Það er allt í lagi að hafa háa standlampa, það er bara flott að láta birtuna koma frá þeim.

10. Með því að hengja listaverkin þín ekki alltaf fyrir miðju, t.d. yfir miðjum sófanum, mun það draga athyglina að þeim og skapa áhrif hins óvænta.

11. Tveir stólar hlið við hlið þurfa ekki að vera eins. Prófaðu að setja saman tvo stóla frá svipuðu tímabili en með ólíka lögun. Það kemur skemmtilega út.

12. Ef þú ert í vafa, bættu smávegis svörtu við.

Texti / Guðríður Haraldsdóttir

Ástin kviknaði í Biggest Loser

Líf Örnu hefur gjörbreyst á tæpu ári.

Ítarlegt viðtal er við Örnu í 4. tölublaði Vikunnar 2018.

Arna Vilhjálmsdóttir sigraði keppnina Biggest Loser Ísland á síðasta ári. Hún breytti algerlega um lífsstíl, æfði oft á dag og missti í allt 60 kíló á sjö mánuðum. Mitt í öllum hasarnum fann hún líka ástina, flutti og fékk nýtt starf.

„Ég byrjaði að verða skotin í honum þegar við höfðum verið í fjórar eða fimm vikur á Bifröst. Ef hann var úti að grilla, fór ég út með fótboltann að sparka í vegg, bara til þess að geta hangið með honum, fór að vera lengur í pottinum bara til að spjalla við hann og þess háttar. Ég neitaði þessu náttúrlega staðfastlega við stelpurnar þegar þær inntu mig eftir því hvort ég væri bara ekki orðin skotin í honum. Þegar hann datt út úr keppninni varð ég alveg eyðilögð,“ segir Arna.

„Það gerðist samt ekkert á milli okkar í þáttunum, eða sem sagt á Bifröst. Eftir að ég kom heim addaði ég honum hins vegar á Snapchat og ruddist inn í líf hans með stanslausum snöppum og samtölum,“ segir hún hlæjandi. „Ég var samt með varann á mér og passaði mig á því að verða ekki of hrifin því ég var viss um að hrifningin væri aðeins mín megin en þannig hefur það alltaf verið hjá mér.“

Ítarlegt viðtal er við Örnu í 4. tölublaði Vikunnar sem kemur í verslanir á morgun, 25. janúar 2018.

Texti / Ragnhildur Aðalsteinsdóttir
Myndir / Aldís Pálsdóttir
Förðun / Hrafnhildur Runólfsdóttir með Urban Decay

Aldagömul aðferð gegn öldrun húðar

Andlitsnudd má nota til að vinna gegn öldrun húðar.

Það er fátt sem veitir jafnmikla afslöppun og vellíðan og gott nudd. Flestir þekkja það sem leið til að losa um spennu og bólgur í vöðvum líkamans en færri gera sér grein fyrir að það má einnig nýta til að sporna gegn öldrun húðar.

Eftir því sem við eldumst lætur húðin meira og meira á sjá; vefirnir slappast, andlitið missir fyllingu og hrukkur myndast. Við höfum áður fjallað um hvernig sé mögulegt að hægja á þessu ferli með réttri húðumhirðu en einnig  má ná töluverðum árangri með því einu að nudda andlitið reglulega.

Andlitsnudd eykur blóðflæði til húðar sem eykur ljóma og þéttni hennar ásamt því að byggja upp vöðvana sem spornar gegn því að hún slappist niður.

Til eru ýmsar aðferðir við andlitsnudd og sumar þeirra hafa tíðkast í margar aldir,  til dæmis er talið að Kleópatra hafi nuddað andlit sitt til að viðhalda fegurð sinni. Á 19. öld notuðu svo geishurnar í Japan svokallað shiatsu-nudd, eða punktanudd. Þá eru fingurgómarnir notaðir til að þrýsta létt á valda punkta á andlitinu sem hjálpar sogæðakerfinu að losa um stíflur og úrgangsefni sem hafa safnast fyrir í húðinni.

Andlitsnudd eykur blóðflæði til húðar sem eykur ljóma og þéttni hennar ásamt því að byggja upp vöðvana sem spornar gegn því að hún slappist niður. Eftir eingöngu nokkra daga af endurteknu nuddi er hægt að sjá mikinn mun; vöðvarnir eru slakir svo ásýndin verður afslappaðri og unglegri og húðin glóir vegna aukins blóðflæðis og næringar.

Lykillinn að góðu andlitsnuddi er að nota andlitsolíu en einnig má nota  olíuhreinsi til að koma í veg fyrir að húðin dragist til en það eykur líka upptöku virku efnanna í olíunni því þeim er nuddað svo vel inn í húðina.

Andlitsnudd lífgar ekki aðeins upp húðina heldur hefur það einnig slakandi og endurnærandi áhrif á líkama og sál. Við notum andlit okkar og vöðva þess mun meira dagsdaglega en við gerum okkur grein fyrir. Því er algengt að fólk finni fyrir ýmsum streitutengdum einkennum, til dæmis spennuhöfuðverk eða augnþreytu sem má losa um með nuddinu.

Einfalt punktanudd fyrir andlit

1. Gott er að byrja með léttum en þéttum strokum upp á við og til hliðar, yfir bæði kinnar og enni, til að undirbúa húðina. Síðan eru fingurgómar löngutangar notaðir til að þrýsta á punkta á andlitinu.
2. Þrýst er á milli augabrúna og svo á þrjá punkta upp enni að hársrót. Því næst á miðjar augabrúnir og svo aftur þrjá punkta upp enni að hársrót. Sama aðferð er svo einnig endurtekin við enda augabrúna.
3. Næst er þrýst undir augun, frá nefi og á fjóra punkta að gagnauga. Endurtakið þrisvar sinnum.
4. Síðan er þrýst á sex punkta með fram kinnbeinum þangað sem kjálki og kinnbein mætast. Endurtakið þrisvar sinnum.
5. Undir miðnesi er þrýst á fjóra punkta með fram efri vör að munnvikum. Endurtakið þrisvar sinnum.
6. Þrýst er undir miðja neðri.vör, með báðum fingrum, svo þrjá punta niður miðja höku og endurtekið þrisvar sinnum.
7. Að lokum má klípa létt í húðina með vísifingri og þumalfingri. Á enni er klipið með fram augabrún, um það bil fjögur klíp, og endurtekið þrisvar. Síðan er klipið frá miðri höku og með fram kjálka, um átta klíp að eyra.

Texti / Hildur Friðriksdóttir

Vagga indverskrar matarmenningar í Bretlandi

Í Birmingham er af nógu að taka fyrir þá sem vilja krydda aðeins tilveruna með framandi mat. Margt annað áhugavert er þar líka í boði.

Birmingham er önnur stærsta borg Bretlands, London er stærst. Borgin hefur verið í stöðugri endurnýjun undanfarna áratugi svo byggingarnar eru ýmist mjög gamlar eða ofur nýtískulegar. Í borginni býr um milljón manna og þar ríkir mikið fjölmenningarsamfélag, sama hvað sagt er á FoxNews. Hún er mjög heppilega staðsett í miðju Englands, mitt á milli London og Manchester, svo það má segja að hún brúi bilið milli Norður- og Suður-Englands.

Í Birmingham er gaman að versla því þar er glæsileg verslunarmiðstöð sem nefnist The Bullring. Hún byggir á ríkri markaðshefð en það var fyrst árið 1154 sem markaðir voru haldnir á þessu svæði. Verslun og þjónusta hefur nú vitaskuld færst í nútímalegra horf og nýjasta byggingin líkist einna helst geimskipi og er merkileg á að líta, burtséð frá öllum verslunum sem þar leynast innandyra.

Allir vísindanördar ættu að gera sér ferð í Thinktank-vísindasafnið sem er að margra mati nútímalegasta vísindasafn heims. Þar eru tíu sýningarsalir sem eru stútfullir af fróðleik og skemmtun. Hægt er að fræðast um allt frá samgöngutækni að meltingarkerfi okkar og hvernig bragðlaukarnir virka.

Þeir sem vilja heldur skemmta sér úti í náttúrunni ættu að leggja leið sína í Cannock Chase- og Wyre-skóginn. Þar er að finna Go Ape sem er einn vinsælasti skógarskemmtigarðurinn í Bretlandi. Svífðu niður á milli trjáa á vír eða sveiflaðu þér um, eins og Tarzan, í þartilgerðum rólum. Þeir sem vilja heldur njóta náttúrunnar og umhverfisins í skóginum á rólegri máta geta ferðast um á Segway sem gerir þeim kleift að sjá meira á skemmri tíma en ef þeir væru fótgangandi.

Af nógu er að taka fyrir þá sem vilja krydda aðeins tilveruna með framandi mat en Birmingham er oft lýst sem vöggu indverskrar matarmenningar í Bretlandi. Þar er að finna eitt allrabesta úrval asískra og indverskra veitingastaða og það á sérstaklega við um hinn svokallaða Balti-þríhyrning, á mótum hverfanna Sparkbrook, Balsall Heath og Moseley. Balti er þunnur karríréttur upprunninn frá svæðinu í kringum Kasmír á landamærum Indlands og Pakistan og nafnið vísar til skálarinnar sem karríið er borið fram í.

Texti  / Hildur Friðriksdóttir

Íslenskar svefnrannsóknir á heimsmælikvarða

Erna Kristín

Margir þekkja það að fá ónógan svefn. Foreldrar ungbarna sem sofa illa á nóttunni, fólk sem starfar á óhefðbundnum tímum sólarhringsins og svo þeir sem eiga erfitt með að sofna á kvöldin. Jafnvel þeir sem hrökkva upp á nóttunni eða vakna fyrr á morgnanna en þeir hefðu ætlað sér. Einnig eru margir sem stytta svefn sinn, sérstaklega á virkum dögum vegna tímaskots. Þessu fylgir oft mikil vanlíðan, syfja og þreyta sem litar þá líðan fólks allan daginn.

Erna Sif Arnardóttir doktor í svefnrannsóknum segir þetta áhyggjuefni. „Flestir fullorðnir þurfa 7-8 tíma svefn til að líða vel þó sumir komast af með minni svefn eða aðrir þurfi lengri tíma. Margir freistast til að stytta svefninn í amstri dagsins og eru jafnvel að sofa einungis 5-6 tíma á virkum dögum en bæta sér það svo upp um helgar. Ég lýsi þessu oft sem jafngildi þess að borða óhollan mat í fimm daga og reyna svo að bæta það upp með salatáti í tvo daga, auðvitað betra að sofa alltaf of stutt en ekki hollt til lengri tíma.”

Reyndu að fara að sofa á svipuðum tíma og vakna á svipuðum tíma flesta daga, bæði á virkum dögum og um helgar. Þegar svefntíma er seinkað mikið um helgar, á fólk oft erfitt með að sofna á sunnudagskvöldum og fer þreytt og illa sofið inn í vinnuvikuna.

Prófaðu þig áfram með magn svefns sem þarft. Flestir þurfa 7-8 tíma en þetta er þó einstaklingsbundið, prófaðu að reyna að auka svefntíma kerfisbundið um 15 – 30 mínútur í einu og sjáðu hvort þú finnir fyrir bætri líðan.

Ef þú átt erfitt með svefn, að sofna á kvöldin, vaknar oft upp á nóttunni eða vaknar of snemma á morgnanna, skoðaðu svefnvenjur þínar. Best er þá að sleppa því að leggja sig í eftirmiðdaginn eða dotta yfir sjónvarpi því þetta getur haft neikvæð áhrif á nætursvefninn.

Slepptu öllu koffeini frá hádegi og sjáðu hvort svefninn batni við það. Gott að prófa slökun eða hugleiðsluæfingar til að hjálpa með svefninn.

Ef þú ert glaðvakandi um miðja nótt og hefur reynt slökun til að sofna er gott að fara fram úr rúminu, setjast og lesa frammi eða gera eitthvað sem fær þig til að hætta að hugsa um svefninn en er jafnframt slakandi. Þegar þú finnur aftur til syfju, þá geturðu farið aftur upp í rúm og reynt að sofna.

Prófaðu að sleppa snjallsímanum, spjaldtölvunni og sjónvarpinu síðustu klukkustundirnar fyrir svefn. Lestu frekar, farðu í bað eða annað slakandi. Þekkt er að tækjanotkun á kvöldin ýtir undir svefnleysi, sverfngæði versnar og og fólk er lengur að sofna. Einnig getur líkamsrækt seint um kvöld seinkað svefntíma.

Ítarlegt viðtal við Ernu má lesa í síðasta tölublaði Vikunnar.

Texti / Íris Hauksdóttir
Mynd / Hákon Davíð Björnsson

Minni diskar – minni skammtastærðir

Næringarfræðingurinn Christian Bitz hvetur fólk til að borða góðan og heilsusamlegan mat, án allra öfga, skyndilausna eða samviskubits.

Christian hefur hannað sérstakan borðbúnað sem er hugsaður og hannaður þannig að hann geri fólki auðveldara að stjórna skammtastærðunum og njóta matarins.

Christian Bitz er heilmikið til lista lagt, en hann er næringarfræðingur, metsölubókahöfundur, fyrirlesari og kemur reglulega fram í hinum ýmsu sjónvarpsþáttum í Danmörku. Hugmyndafræði hans byggir meðal annars á því að fólk lifi heilsusamlegu lífi og njóti þess að borða góðan og heilsusamlegan mat, án allra öfga, skyndilausna eða samviskubits. Hann hefur líka hannað sérstakan borðbúnað sem er hugsaður og hannaður þannig að hann geri fólki auðveldara að stjórna skammtastærðunum og njóta matarins.

Hvaðan kemur áhugi þinn á heilsu og mataræði?
Ég starfaði sem fyrirsæta víðsvegar um heiminn á tíunda áratugnum. Á þeim tíma þurfti ég að hugsa vel um eigin heilsu og áhugi minn jókst á því hvernig ég gæti náð hámarksárangri með réttu mataræði og hreyfingu. Í framhaldi af því ákvað ég að fara í nám og læra meira um það hvernig mataræði hefur í raun áhrif á líf okkar á hverjum degi.

Hverjir eru lykilþættir heilbrigðs lífstíls að þínu mati?
Fyrir það fyrsta þurfum við einfaldlega að byrja að njóta matarins aftur. Stundum einblínum við of mikið á megrun í stað matar. Síðan held ég að lykillinn að góðu mataræði og betri heilsu sé að borða rétt hlutfall kolvetna og próteins. Stærsta rannsókn sinnar tegundar, DIOGENES sem stendur fyrir Diet – Obesity – Genes, hefur sýnt fram á að besta hlutfallið sé 1:2 af kolvetnum og próteini.

Hvers vegna ákvaðstu að hanna borðbúnað?
Mitt markmið er að gera heiminn örlítið heilbrigðari. Með því að hanna minn eigin borðbúnað get ég verið við kvöldmatarborðið á hverju heimili. Allar kenningar mínar og uppskriftir geta notið stuðnings af réttum borðbúnaði og saman getur það leitt til heilbrigðara lífs.

Hver er hugmyndin eða innblásturinn á bak við borðbúnaðinn?
Grunnhugmyndin var að hanna kvöldmatardisk sem rúmar minna því allar rannsóknir sýna að minni diskar þýða minni skammtastærðir. Minni skammtastærðir þýða færri hitaeiningar og fólk er ekkert endilega líklegra til að fá sér aftur á diskinn.

Skiptir það máli að borðbúnaðurinn sé fallegur?
Ég vildi bæta auknum lit, óformlegheitum og ófullkomnun við matarborðið, þess vegna ákvað ég að nota hráan efnivið sem er innblásinn af norrænni náttúru. Ég tel að það að borða af fallegum diskum auki ánægjuna. Rannsóknir hafa líka sýnt að við skynjum mat á ólíkan hátt á svörtum, hvítum eða grænum diskum. Heilsusamlegur matur hefur líka lengi fengið á sig þann stimpil að hann sé óspennandi. Borðbúnaðurinn minn getur því kannski hleypt smávegis lífi í matseldina.

Texti / Hildur Friðriksdóttir
Myndir / Úr einkasafni

Auktu hamingju þína með einföldum ráðum

Nokkur ráð til að auka hamingju sína.

Engin þörf er á því að verja stórfé eða snúa lífi sínu á hvolf til að hækka hamingjustigið hjá sér. Heilmargt er hægt að gera til að auka hamingju sína og hér eru nokkur ráð sem gott væri að tileinka sér.

Mikilvægi jákvæðra hugsana
Það er sérdeilis gott að venja sig á að hugsa jákvætt um sjálfan sig á hverjum degi, þó ekki væri nema í nokkrar sekúndur. Dást að nýju klippingunni fyrir framan spegilinn, þakka sér góðan árangur eða dugnað og annað í þeim dúr. Gott er líka að skrifa niður hugsanir sínar eins oft og hægt er og geyma þar sem aðrir sjá ekki, með því að koma þeim á blað nær maður samhengi hlutanna betur. Ekki hika við að deila góðum stundum með öðrum, til dæmis á Facebook eða snappinu.

Mikilvægi hvíldar
Hvíld er mikilvæg, ekki bara heima, heldur líka í vinnunni. Þegar mikið er að gera freistast maður til að fá sér snarl og borða það á meðan maður vinnur. Betra er að taka sér stutta pásu en enga og koma ferskari að verkefninu á eftir. Helgarfríum verja flestir í skemmtanir, ferðalög og annað slíkt en ekki má gleyma hvíldinni. Það tekur langan tíma að ná úr sér uppsafnaðri þreytu, svo verum ekkert að safna henni upp. Með því til dæmis að kíkja á tölvupóstinn sinn um leið og maður vaknar er maður sjálfkrafa kominn í vinnugírinn í stað þess að leyfa huganum að hvílast ögn lengur, eða þar til komið er til vinnu.

Litlar áskoranir
Finndu leið til að hrista upp í daglegri rútínu þinni til að hún festist ekki í fari. Lítil áskorun vikulega? Að brosa framan í einhvern ókunnugan sem gleður ekki bara viðkomandi, heldur einnig þig. Sjónvarps- eða símalaus dagur í algjörri ró. Eða klífa fjöll ef þú hefur ekki prófað það. Prófa nýjan kaffidrykk eða nýjan veitingastað. Allt til að breyta aðeins út af vananum.

Sniðugt er líka að gera alltaf eitthvað spennandi einn dag í viku. Það þarf ekki að vera stórt, kannski ilmandi freyðibað eða að byrja á nýrri bók, eitthvað sem þú getur hlakkað til alla vikuna. Föstudagar, í lok vinnuvikunnar hjá flestum, gætu verið hentugir.

Texti / Guðríður Haraldsdóttir

1...1.4661.4671.468...1.477Síðu 1.467 af 1.477

Raddir

© 2023 Mannlíf.is. Allur réttur áskilinn. Notkun á efni miðilsins er óheimil án samþykkis.