Viðar Sigurjónsson komst ekki í hjartaþræðingu á Landspítalanum.
Eins og Mannlíf greindi frá í gær gat sjúkraflugvél Mýflugs ekki lent á Reykjavíkurflugvelli vegna mikils hliðarvinds og þurfti að snúa flugvélinni við. Leifur Hallgrímsson, framkvæmdastjóri Mýflugs, lét hafa það eftir sér að ef neyðarbrautin væri ennþá opin hefðu sjúklingarnir tveir komist á Landspítalann. Viðar Sigurjónsson er annar þeirra sem átti koma til Reykjavíkur með fluginu og hann er vægast sagt ósáttur.
„Ég upplifði nákvæmlega það sem ég óttaðist þegar ákveðið var að loka neyðarbrautinni á sínum tíma,“ sagði Viðar í samtali við Akureyri.net. „Það var pólitísk ákvörðun að loka neyðarbrautinni á Reykjavíkurflugvelli á sínum tíma og ég mun aldrei fyrirgefa þá gjörð fyrst ekki var búið að finna aðra lausn áður.“
„Ef við eigum einn vatnsbrunn sem heldur í okkur lífi getum við ekki lokað honum fyrr en við finnum annan. Geta ekki allir verið sammála um það?“ spurði Viðar.
„Ef eitthvað annað hefði verið komið í staðinn fyrir neyðarbrautina á sínum tíma hefði þetta ekki verið neitt mál. Það eru léttvægar skýringar að hægt sé að redda þessu með öðrum hætti ef ekkert gerist; nú eru nokkur ár síðan brautin var aflögð og ekkert hefur gerst,“ sagði Viðar um málið.