Flugsveit danska flughersins er komin til Íslands en það er liður í loftrýmisgæslu Atlantshafsbandalagsins við landið.
Á vef Landhelgisgæslunnar segir að þetta sé í fimmta skipti sem Danir leggja Atlantshafsbandalaginu til flugsveit til að taka þátt í verkefni á Íslandi. Síðast var það árið 2018.
Á síðu Gæslunnar kemur fram að flugsveitin muni taka þátt í verkefninu auk starfsmanna í stjórnstöðvum Atlantshafsbandalagsins í Uedem, Þýskalandi og á öryggissvæðinu á Keflavíkurflugvelli. Danska flugsveitin sem kemur til landsins í dag er með fjórar F-16 orrustuþotur og 70 liðsmenn.
Búast má við aðflugsæfingum að varaflugvöllum á Akureyri og Egilsstöðum á milli 12. til 20 ágúst.
Að sögn Gæslunnar verður framkvæmd verkefnisins með sama sniði og fyrri ár og í samræmi við loftrýmisgæsluáætlun Atlantshafsbandalaginu fyrir Ísland.
Hefur flugsveitin aðsetur á öryggissvæðinu á Keflavíkurflugvelli en þar dvelja aukreitis flugsveitir aðildarríkja Atlantshafsbandalagsins við kafbátaeftirlit.
Utanumhald á framkvæmd verkefnisins fer Landhelgisgæslan með í umboði utanríkisráðuneytisins og í samvinnu við Isavia.
Áætlað er að ljúka loftrýmisgæslunni um miðjan september.