Styður þjóðarsátt gegn verðbólgu og vill taka á ofurlaunum forstjóra
Formaður Sjálfstæðisflokksins og fjármálaráðherra, Bjarni Benediktsson, er sammála orðum seðlabankastjóra, Ásgeirs Jónssonar, varðandi þjóðarsátt um átak gegn verðbólgunni.
Segir að vandinn sé þess eðlis að allir þurfi að leggjast á eitt.
Bjarni segir átak gegn verðbólgu hafa lengi verið á dagskrá; Seðlabankinn hafi og fengið betri stjórntæki; einnig að tekið hafi verið til í opinberum fjármálum og fleira til að styrkja enn betur umgjörðina um efnahagslegan stöðugleika.
„En það er engin spurning að það er gríðarlega mikið hagsmunamál í tengslum við, til dæmis, næstu kjaralotu og það hvernig við skipuleggjum opinberu fjármálin til næstu ára að það takist að lækka verðbólguna, Það skiptir miklu máli í fyrsta lagi fyrir heimilin, í öðru lagi fyrir atvinnulífið heilt yfir, en ríkissjóður og sveitarfélögin eru ekkert undanskilin heldur. Það bara er stórmál að ná verðbólgu niður og þá munu vextirnir fylgja í kjölfarið og fjármagnskostnaður minnka,“ sagði Bjarni í samtali við ruv.is.