Fjölmiðlakonan Snæfríður Ingadóttir býr á Tenerife sem stendur og gengur yngsta dóttir hennar, Bryndís Brá, 8 ára, í svokallaðan náttúruskóla á eyjunni kanarísku. Þar er náttúran nýtt sem kennslustofa og segir Snæfríður svo miklu fleiri möguleika í boði varðandi skólagöngu barna á Tenerife en á Íslandi.
Snæfríður segir frá þessu og birtir myndir af Bryndísi í náttúruskólanum í færslu á Facebook. Þar segir móðirin:
„Yngsta dóttirin Bryndís Brá, 8 ára, er í nokkuð sérstökum skóla hér úti á Tenerife þar sem náttúran er kennslustofan. Ekki allir skólar hafa veggi á kanarísku eyjunum, og á Spáni líka, þá eru svo miklu meiri möguleikar í boði varðandi skólagöngu barna heldur en á Íslandi. Við fjölskyldan erum, eins og svo oft áður, í nokkra mánaða dvöl á Tenerife og að þessu sinni ákváðum við að láta yngstu dóttur okkar í náttúruskóla. Ekki er um hefðbundinn skóla að ræða, þó hann hafi full leyfi til skólareksturs,“ segir Snæfríður og heldur áfram:
Mikil áhersla er lögð á náttúruna og eru börnin alfarið utandyra fram að hádegismat. Það þurfti ekki að sannfæra dótturina lengi um að þetta væri skemmtilegur skóli því strax fyrsta skóladaginn fékk hún að halda á eðlu og læra um það hvernig skottið á henni vex aftur ef hún missir það.“