Örtröð myndaðist í Vínbúðum landsins síðdegis í gær, eftir að tilkynnt var um hertar sóttvarnaraðgerðir og voru hillur farnar að tæmast í lok dags.
Fólk var augljóslega að byrgja sig upp og þar með að reyna sleppa við að þurfa bíða í biðröðum til að komast inn í áfengisverslanir, sem gæti óhjákvæmilega gerst eftir að fjöldatakmarkanir tóku gildi á miðnætti.
Gera þurfti aukapantanir í mörgum ÁTVR verslunum landsins sökum aukinnar sölu í gær, samkvæmt verslunarstjóra Vínbúðarinnar á Eiðistorgi. Segir hann það ekki hafa farið fram hjá neinum að mun meira var að gera í gær, en á hefðbundnum miðvikudegi.
Sala áfengis í Vínbúðum hefur aukist mikið í COVID-19 faraldrinum og virðist ekkert lát vera á þeirri sölu miðað við þetta. Til að mynda náði sala jólabjórs nýjum hæðum í desember síðastliðnum. Tölur sýndu að salan hefði margfaldast frá fyrri árum.
Sjá einnig: „Færri leita í meðferð meðan drykkja hefur stóraukist í Covid-faraldrinum“