Íþróttamaðurinn fyrrverandi og núverandi leiðsögumaður Adolf Ingi Erlingsson birtir innan Facebook-hópsins Bakland Ferðaþjónustunnar mynd sem hann segir að sé tekin á einum stærsta flugvelli Evrópu. Þar er ekkert að gerast. Adolf bendir á að skimun segi ekki allt, kreppan nú væri líklega jafn slæm þó ekkert væri skimað. Adolf skrifar:
„Þegar býsnast er yfir skimun á landamærum og afleiðingar hennar ættum við kannski að hugleiða hvort einhver spurn sé eftir ferðalögum sem stendur. Þessi mynd er tekin á einum fjölfarnasta flugvelli Evrópu í Frankfurt.“
Myndina má sjá hér fyrir neðan. Sumir eru þó ósammála honum, eins og Pétur Óskarsson sem skrifar:
„Það sést ekki á þessari mynd að í júlí fóru 43.000 farþegar á dag um flugvöllinn í Frankfurt og í ágúst voru það u.þ.b. 50.000 á dag. Núna í október fara um 200 vélar á sólahring í loftið frá FRA, þar af eru 2/3 hluti að fljúga til annara landa eins og Noregs, Svíþjóðar, UK, Portúgal, Grikklands, Spánar o.s.f.v. Flugvöllurinn er keyrður á u.þ.b. 22% af venjulegum afköstum. Til samanburðar er Keflavík á u.þ.b. 2% af venjulegum afköstum. Sjö daga meðaltal nýrra smita í Þýskalandi er nú 28,9 á 100 þús. en á Íslandi eru talan 166,1 á 100 þús íbúa. Við sem störfum á Þýskalandsmarkaði vitum að ferðaviljinn er mikill, ef það væri mögulegt að koma hingað sem ferðamenn þá myndu Þjóðverjar koma hingað í einhverjum mæli.“
