Björn Leifsson, yfirleitt kenndur við líkamsræktarstöðvar sínar World Class, segist vilja loka ÁTVR, Ríkinu, meðan COVID gengur yfir. Þetta kom fram í viðtali við hann í Morgunútvarpi Rás 2 í morgun. Hann segir að yfirvöld ættu að stöðva alla áfengissölu í tvær vikur.
„Ég vil loka Ríkinu og banna áfengissölu tímabundið þannig að fólk sé heilbrigt meðan verið er að ná tökum á þessu. Ég skil alveg að það þurfi að taka á þessu, en af hverju tóku þeir ekki afgerandi skref síðustu helgi og lokuðu öllu í tvær vikur. Þá værum við laus við þetta.“
Björn hefur gagnrýnt harðlega þann tíma sem sóttvarnarráðstafanir taka. Hann telur að líkamsræktarstöðvar ættu að hafa leyfi til að hafa opið. Björn sagði í Morgunútvarpinu að hann hafi boðið sóttvarnarlækni í heimsókn. Þannig gæti hann litið á aðstöðuna og mögulega veita undanþágu.
Björn sagði að sóttvarnarlæknir hafi ekki tekið því boði. „Á sunnudaginn sendi ég sóttvarnarlækni bréf þar sem ég taldi upp allt sem við getum gert og bauð honum í heimsókn. Svarið var bara að það væru ekki gefnar undanþágur.“