Lögmaður manns sem sleppt var í gær eftir að hafa setið í gæsluvarðhaldi í rúma fjóra mánuði án ákæru, segir slíka dvöl geta haft alvarlegar afleiðingar fyrir einstaklinga.
Daníel Andri Einarsson, sem setið hefur í gæsluvarðhaldi í fjóra mánuði, grunaður um að hafa banað Sofiu Sarmite Kolesnikova, án ákæru, hefur nú verið sleppt, samkvæmt frétt RÚV. Hann er þó enn með réttarstöðu grunaðs í málinu og sætir farbanni.
Daníel er grunaður um að hafa banað Sofiu Sarmite Kolesnikova á Selfossi í lok apríl en hann hefur setið í gæsluvarðhaldi síðan, alls í átján vikur en það er langt umfram það sem lög leyfa almennt, nema ákæra sé birt. Hefur hann neitað sök í málinu og segist telja að Sofia hafi látist vegna ofskammts af fíkniefnum. Héraðsdómur Suðurlands féllst á beiðni lögreglunnar um að Daníel yrði úrskurðaður í farbann.
Vilhjálmur H. Vilhjálmsson, lögmaður Daníels sagðist í samtali við Mannlíf ánægður að skjólstæðingur hans sé loksins laus úr gæsluvarðhaldinu. „Ég fagna því að lögreglan á Suðurlandi skuli loksins átta sig á því að það er engin lagaskilyrði til að halda skjólstæðingi mínum áfram í gæsluvarðhaldi, þótt fyrr hefði verið.“
Aðspurður um líðan Daníels eftir gæsluvarðhaldsdvölina sagði Vilhjálmur: „Eðli málsins samkvæmt þá hefur það alvarlegar afleiðingar fyrir fólk að sitja í gæsluvarðhaldi í meira en fjóra mánuði.“