Rakningarteymi almannavarna hefur náð ótrúlegum árangri hér á landi í baráttunni við kórónaveiruna sem veldur COVID-19. Þetta sagði Kári Stefánsson, forstjóri Íslenskrar erfðagreiningar, á upplýsingafundi almannavarna nú síðdegis.
Á fundinum ræddi Kári vísindagrein sem vísindamenn Íslenskrar erfðagreiningar birtu, ásamt öðrum, í læknaritinu New England Journal of Medicine, í gærkvöld.
Þá hrósaði hann rakningateyminu og sagði það hafa náð ótrúlegum árangri.
Hann sagðist hafa kíkt inn á covid.is morgun og séð að ekki hafi tekist að rekja uppruna aðeins átta smita af 1.727 smitum sem hafa greinst hér á landi. Hann sagði þetta vera ótrúlegan árangur og er stoltur af teyminu. „Ég er býsna montinn af þessu fólki,“ sagði Kári um rakningarteymið.
Þess má geta að uppruni átta smita sem greinst hafa hér á landi er óþekktur á meðan 1.382 smit komu upp hér landi og 337 smit má rekja til útlanda samkvæmt upplýsingum á covid.is.