2019 | Birtingur útgáfufélag ehf | k.t. 620867-0129 | VSK.nr 11788 | Síðumúla 28 | Allur réttur áskilinn. Notkun á efni miðilsins er óheimil án samþykkis.

16 tískuslys í fjallgöngu

Eftir því sem mér hefur vaxið fiskur um hrygg í fjallgöngum hef ég orðið meðvitaðri um nauðsyn þess að falla inn í þann ramma sem tíska á fjöllum leyfir. Fyrsta lexían mín var sú að ég gekk á fjöll með gamla skjóðu á bakinu. Hún var merkt símafyrirtæki og bundin að framanverðu með skóreim. Ég var hvorki smáður né fyrirlitinn en hornaugun voru ótalmörg. Á endanum uppgötvaði ég skömm mína og lagði símaskjóðunni og gekk þess í stað stoltur um með viðurkenndan bakpoka sem státar af tískumerki. Ég leitaði til álitsgjafa í 52ja fjalla hópi Ferðafélags Íslands um tískuslys fjallgöngfólks. Þetta er niðurstaðan.

1 Ef þú vilt vera álitin(n) algjör viðvaningur þá læturðu sjá þig í gallabuxum í hlíðum Esjunnar. Algjört tabú.

2 Ekki vera með bakpoka merktan föllnu bönkunum.

3 Ef þú vilt endilega ganga með buff þá gættu þess að það sé merkt viðurkenndum aðila.

AUGLÝSING


4 Ef þú notar íþróttabrjóstahaldara þá máttu ekki hafa hann yfir ullarbolnum.

5 Gættu þess vandlega að spenna ekki á þig bakpokann þannig að fitukeppir myndist að ofan og neðan.

6  Ekki nota jöklagleraugu á jafnsléttu.

7 Ef þú vilt endilega líta út eins og fífl og missa sjónina þá notarðu Ray Ban speglagleraugu í jöklaferð.

8 Regnslár –  eins og tíðkast mikið erlendis – virka alls ekki á Íslandi. Sá sem íklæðist slíku sker sig úr eins og geimvera. Þá eru regnslár gjarnan þunnar og rifna.

9 Notaðu viðurkenndan skófatnað á borð við Scarpa á göngum. Tásuskór eru bannvara. Kona sást á Úlfarsfell í þannig skóm fyrir löngu og er nú alræmd.

10  Það er aulalegt að fara á fjall með verðmiða hangandi á skóm eða fatnaði. Hallærislegt að vera fremstur í brekku með verðmiða á göngskónum.

11 Háhælaðir sandalar sem vaðskór eru dæmi um átakanlegt tískuslys.

12 Gotharar frá Berlín sáust fyrir nokkru á íslensku fjalli, svartmálaðir. Hárið túberað og þeir íklæddir aðsniðnum leðurjökkum, með hliðartösku og í Buffalóskóm. Stórslys.

13 Að renna sér niður snjóskafl í pilsi er ávísun á vandræði. Sá einstaklingur sem slíkt gerir má vera viss um að verða umræðuefni.

14 Ekki ganga á Hvannasdalshnjúk í vaðstígvélum og með plastpoka. Maður sem gerði slíkt fyrir nokkrum árum er kominn á spjöld sögunnar.

15 Ekki binda Bónuspoka utan á bakpokann þinn.

16 Ekki reykja í fjallgöngum. Leyndu því ef þú ert reykingamaður.

Lestu meira

Annað áhugavert efni

Nýjast á Mannlíf.is