Stjórn knattspyrnudeildar FH hefur sent frá sér yfirlýsingu, er varðar meintan ölvunarakstur Eiðs Smára Guðjohnsen. Yfirlýsingin hljómar svona:
„Eiður Smári Guðjohnsen, þjálfari meistarflokks karla, hefur ákveðið í samráði við stjórn knattspyrnudeildar FH að stíga til hliðar af persónulegum ástæðum.
Eiður Smári biður um svigrúm til að vinna í sínum málum og báðir aðilar vonast eftir því að sú vinna verði árangursrík og að Eiður Smári snúi aftur í þjálfarateymi FH í náinni framtíð.
Sigurvin Ólafsson tekur við þjálfun liðsins. Stjórn knattspyrnudeildar FH.“
Ekki er ljóst á þessari stundu hvort ráðning Sigurvins sé tímabundin; svo virðist vera sem stjórn FH meti Eið Smára og störf hans það mikils að hún sé tilbúinn að gefa honum annað tækifæri.
Hávær umræða hefur verið um að Heimir Guðjónsson taki við stjórnartaumunum hjá FH, en miðað við yfirlýsinguna frá stjórn knattspyrnudeildar FH þá virðist sem hún ætli að treysta Sigurvini fyrir hinu erfiða verkefni sem er framundan; að bjarga gamla stórveldinu FH frá falli.