Fallið hefur verið frá launahækkunum bæjarfulltrúa í Reykjanesbæ.
Á fundi bæjarráðs í Reykjanesbæ í gær, 1. júní, samþykktu bæjarráðsfulltrúar samhljóða að falla frá fyrirhuguðum launahækkunum samfara hækkun þingfararkaups. Víkurfréttir segir frá þessu.
Laun bæjarfulltrúa Reykjanesbæjar ættu, samkvæmt samningum, að hækka í samræmi við þingfararkaup í júlí næstkomandi. Launin eru reiknuð þannig að þau eru hlutfall af launum þingmanna og teljast til launa fyrir hlutastörf.
Mikil pressa er í þjóðfélaginu, bæði frá almennum borgurum og verkalýðsfélögunum, á að launahækkanir æðstu ráðamanna landsins verði endurskoðuð, sérstaklega í ljósi efnahagsstöðunnar sem ríkir í landinu. Ríkisstjórn Katrínar Jakobsdóttur er að skoða sína launahækkun en Bjarni Benediktsson fjármálaráðherra hefur sagt að erfitt sé að finna fyrirkomulag um launahækkanir þingmanna og annarra ráðamanna, sem sátt er um.