Flekkir í sjónum sem Landhelgisgæslan hélt að væri mengun reyndist vera loðna.
Fram kemur á vefsíðu Landhelgisgæslunnar að þyrluáhöfnin á TF-GNA hafi í eftirlitsflugi orðið vör við flekki allt í kringum Reykjanesskagann og suður af landinu. Það hafi svo komið í ljós eftir stutta skoðun, að ekki væri um mengun að ræða heldur væru þarna að öllum líkindum, loðnutorfur á ferð. Á svæðinu voru fjöldi uppsjávarveiðiskipa, þar á meðal fjögur loðnuskip frá Færeyjum en eitt þeirra var á veiðum.
Áhöfnin flaug um Garðskaga, fyrir Reykjanes og austur að Surtsey í þessu eftirlitsflugi. Í leiðinni var tekin ákvörðun um að taka hífingar við þrídranga og var sigmanni slakað niður og kannaði hann í leiðinni hvort ekki væri allt eins og það ætti að vera í vitahúsinu, sem það var, samkvæmt vefsíðu Gæslunnar. Að því loknu var sigmaðurinn hífður upp aftur og var haldið til Heimaeyjar þar sem eldsneyti var tekið og svo flogið áleiðis til borgarinnar.