Fjöldi rannsókna gefur tilefni til að binda vonir við virkni Psilocybin, hugbreytandi efni sem finnst í ofskynjunarsveppum, gegn meðferðarþráu þunglyndi, og verið hefur talsvert til umræðu að undanförnu.
Í dag er staðan sú að talið er að á bilinu 15 til 30 prósent þeirra sem þjást af völdum þunglyndis svari illa meðferð, en þetta kemur fram á vefnum ruv.is.
Sveppirnir eru ekki ný uppgötvun; hvað þá virkni þeirra; vitað er til þess að þeir hafi verið notaðir við helgiathafnir í Mexíkó fyrir um þrjú þúsund árum.
En svo leið og beið.
Þegar komið var fram á sjötta áratug síðustu aldar hófust rannsóknir á áhrifum psilocybins á geðraskanir; en þær rannsóknir voru stöðvaðar þegar að sveppirnir áðurnefndu voru gerðir ólöglegir í Bandaríkjunum árið 1970.
Kemur fram í nýrri grein í Læknablaðinu að ný safngreining sýni marktækan árangur psilocybin-meðferðar við meðferðarþráu þunglyndi. Og þar kemur einnig fram að niðurstöður úr fasa 2-rannsókn lofi afar góðu.
Til að psilocybin-meðferð fái ábendingu – sem og markaðsleyfi – hjá lyfjastofnunum er næsta stóra skrefið að ljúka fjölþjóðlegri fasa 3-rannsókn – sem stefnt er að því að hefjist á þessu ári; þannig gæti sjúklingum með meðferðarþrátt þunglyndi innan örfárra ára staðið til boða að reyna slíka meðferð.
Þær aukaverkanir sem komu í ljós voru yfirleitt metnar vægar og/eða meðalalvarlegar, og entust ekki lengi.
Meðferðin mögulega fer þannig fram að sjúklingur fær 25 milligrömm af psilocybini, oftlega í eitt skipti, leggst svo fyrir í fimm til átta klukkustundir; eða þann tíma sem ofskynjunaráhrifin vara – með bundið fyrir augu og tónlist í eyrunum. Fagaðili verður að sitja yfir sjúklingnum allan tímann. Og svo virðist sem jákvæðra áhrifa á geðheilsu sjúklinga geti síðan gætt svo mánuðum skipti eftir eina slíka meðferð.