Enn er ekki komið á hreint hvort milljarðahöllin í Garðabæ, Miðgarður, hljóti undanþágu KSÍ og geti því kallast keppnisvöllur fyrir Bestu deildina í sumar. Algjör þögn er um málið hjá bæjarstjórn Garðabæjar og stjórn KSÍ.
Mannlíf hefur fjallað um málið undanfarið en það er hið furðulegasta. Í byrjun mars fullyrti Ásta Sigrún Magnúsdóttir að KSÍ hefði gefið grænt ljós á knattspyrnuleikir í efstu deild kvenna og karla, mættu fara fram í Miðgarði. Frá KSÍ bárust hins vegar þau svör að enn væri ekki búið að taka ákvörðun um málið. Blaðamaður Mannlífs var svo dreginn áfram á asnaeyrunum en meðlimir mannvirkjadeildar KSÍ nefndu nokkrar dagsetning þar sem málið yrði tekið fyrir á fundi. Síðast átti að taka endanlega ákvörðun þann 12. apríl en nú, tveimur dögum síðar hefur Mannlífi ekki enn borist svar frá KSÍ hvort Miðgarður, sem kostaði hátt í fimm milljarða króna, fengi undanþágu til að bjóða liðum í Bestu deildinni að keppa þar. Undanþáguna þarf Miðgarður vegna þess að það vantar rúmlega sex metra upp á lofthæðina svo völlurinn teljist löglegur keppnisvöllur.
Mannlíf sendi einnig tölvupóst á upplýsingafulltrúa Garðabæjar og spurði af hverju hún hefði sagt í byrjun mars, að vallarleyfið væri komið frá KSÍ, þegar sambandið átti eftir að funda um málið. Ekkert svar barst frá Garðabæ.
Það er sem sagt enn á huldu hvort milljarðahöllin verði áfram æfingarhúsnæði eða hvort hún fái stimpil frá KSÍ sem fullgildur keppnisvöllur fyrir efstu deildirnar.