Jón Baldvin Hannibalsson, fyrrverandi ráðherra, hefur enn lagt upp í leiðangur til að verjast konum sem sakað hafa hann um að hafa áreitt sig kynferðislega. Að þessu sinni er þó ekki aðeins um ásakanir meintra þolenda að ræða því saksóknari hefur ákært Jón Baldvin fyrir að hafa misboðið og káfað á Carmen Jóhannsdóttur, æskuvinkonu Aldísar dóttur Jóns. Tilgreint er að meint káf hafi átti sér stað í vitna viðurvist.
Mynd / Facebook
Jón Baldvin hefur ákveðið þá varnartækni að beita konu sinni, Bryndís Schram, fyrir sig. Þannig segir hann í grein í Mogga að þetta sé „seinasta útspilið“ í skipulagðri aðför að mannorði sínu og Bryndísar. Hvergi er vitað til þess að Bryndísi hafi verið álasað fyrir meinta framgöngu eiginmanns síns. Þvert á móti nýtur hún í senn samúðar og virðingar á erfiðum tímum. Vörn Jóns Baldvins er í raun sú sama og gerist hjá Samherja í Namibíumáli fyrirtækisins. Þorsteinn Már Baldvinsson forstjóri hefur ítrekað sagt að umfjöllun Kveiks og Stundarinnar um mútur og annað siðleysi stjórnenda hafi beinst að starfsfólki Samherja þegar hann sjálfur ber einn stærsta ábyrgð á því hvernig komið er. Blásaklaus fiskverkakonan er notuð sem skjöldur fyrir forstjórann. Að sama skapi er útilokað að Bryndís beri ábyrgð á málum eiginsmanns síns. Vörnin heitir að taka Samherja á þetta. Svona spuni er að ráði misviturra ráðgjafa og lýsir ekki öðru en málefnaþurrð og ráðaleysi þeirra sem sætta sig ekki við að vera útmálaðir sem skúrkar.
Á meðal þeirra kvenna sem hafa sakað Jón Baldvin um áreiti er dóttir hans, Aldís. Jón Baldvin hefur svarað þeirri ásökun með því að stefna sinni eigin dóttur fyrir dómstóla fyrir meiðyrði. Önnur þeirra sem sakar ráðherrann fyrrverandi um ósæmilega framgöngu er systurdóttir eiginkonu hans, Guðrún Harðardóttir, sem árið 2012, lýsti áreiti Jóns Baldvins. Hún sagði frá tilraunum hans til að kyssa sig á Ítalíu þegar hún var táningur og næturheimsóknum Jóns Baldvins í herbergi hennar. Átökin innan fjölskyldu Bryndísar og Jóns Baldvins eru auðvitað mikill harmleikur.
Það er enginn sómi af því hjá Jóni Baldvin að að fara í Moggann með ásakanir um að Carmen, meintur þolandi, sé lygari. Það er líka snautlegt að fara í mál við eigin dóttur. Þá er beinlínis til skammar að draga Bryndísi inn í málin. Kærur, ásakanir og loksins ákæra á gamla leiðtogann snúa engan veginn að neinum öðrum, hvað sem líður meðvirkni stöku fjölskyldumeðlima hans.
Dómstólar munu kveða upp úr um sekt eða sakleysi Jóns Baldvins sem situr undir þungum ásökunum frá fjölda kvenna um ósæmilegt athæfi. Þar til dómur fellur væri Jóni sæmst að einbeita sér að vörninni á vettvangi dómstólanna. Ferill Jóns Baldvins í stjórnmálum er að mörgu leyti stórbrotinn en með hverju axarskafti lítillækkar hann sig og eftirmælin fara að snúast um afglöp í einkalífinu fremur en sigra í stjórnmálum.